Eleccións 23, 27 de febreiro – Non é habitual que se produzan cambios a cen días dunhas eleccións pero estas municipais comezan a ser algo pouco común en moitos casos.
Na bisbarra falase do cambio de candidato en Teo tras a renuncia de Patricia Castelao; da renovación no PP de ese mesmo concello… que non é tanta como veremos; de que en Vedra o Psoe ten dificultades para armar unha lista; da volta de parlamentario popular Ovidio Rodeiro a Boqueixón ou do inesperado xiro de timón no PP de Dodro, ordenado desde a cúpula. Situacións todas inesperadas hai un par de meses.
Dodro, cambios desde arriba
O PP de Dodro vive estes días unha crise interna que aínda está por ver en que quedará. Valentín Alfonsín Somoza perdeu a alcaldía hai catro anos, despois de gobernar o concello desde o 2011 ao 2019.
A Asemblea local de hai unha semana decidía que fose de novo o candidato pese a oposición de algúns membros. O venres o partido o substituía por Marisol Boga, un cambio que motivaba un considerable enfado de Somoza que o facía visible nas redes sociais. Lindeiros falaba con el este domingo para que nos contara, desde o seu punto de vista, que sucedera.
Somoza conta que o na reunión do luns Marisol Boga xa se posicionara en contra da súa candidatura pero que a agrupación local non a apoiou.
Preguntado por si pensa presentarse por outra formación, explica que serán os veciños os que terán que decidilo e que se debe a eles.
.
Cambios pero non tanto
Outro dos cambios de última hora foi o do PP de Teo, que levaba incluída sorpresa. Guerra deixaba o número 1 a Lucía Calvo pero co que ninguén podía contar e que fora de número 2, algo que a nova candidata anunciaba na presentación de este venres.
Un posto que, no caso de acadar a alcaldía e que a número 1 deixara por calquera motivo o concello, deixaría, en principio, a Guerra como alcalde.
Tamén en Teo a renuncia de Patricia Castelao a ser a candidata do BNG deixou a Eloi Devesa en ese posto. Unha vez coñecido quen a substituiría, Castelao renunciou ao posto de concelleira abrindo todo tipo de especulacións sobre as diferencias internas no partido. Devesa declaraba a Lindeiros que non cambia nada e o proxecto segue adiante
Sobre o pouco habitual que resulta, especialmente nun partido tan monolítico como o BNG, ter nunha lexislatura ata 4 voceiros, Eloi Devesa o achaca a motivos laborais e persoais nos que non pode entrar.
En canto ás posibilidades de cara aos comicios, o candidato nacionalista considera que poden loitar pola alcaldía.
Ata o 28 de maio pode pasar de todo en todos os concellos. Nas últimas semanas a bisbarra pasou dunha parálise electoral na que quedaban varios candidatos por decidir, a unha actividade frenética que meteunos de cheo en ambiente electoral. Estaremos atentos a todo o que suceda
