BNG Teo
Eleccións 23, 11 de maio – As veces nas carreiras un dos participantes, movido polos nervios ou a tensión do momento da saída, anticípase e é sancionado. Onte descubrimos que tamén pasa nas eleccións.
Teo sempre foi un concello no que pasan cousas distintas, nin mellores nin peores, que en outros municipios. Na tarde de onte toda a estrada que vai desde Cacheiras ata Os Tilos apareceu con pancartas do BNG, máis de 24 horas antes de que comece a campaña.
Certo é que as pancartas só mostraban o nome do partido sen petición de voto nin lema algún. Lindeiros falou co candidato Eloi Devesa quen explica que “nos non estamos pedindo o voto en ningún momento [] no BNG este tipo de cousas as facemos os militantes, non contratamos empresas, a xente ten xornadas laborais y o tempo é moi moi escaso e todo o que podemos adiantar o estamos adiantando pero bueno si que é certo que non debería ser o habitual pero somos un partido que dependemos da militancia e das xornadas dos mesmos”.
Fontes consultadas por Lindeiros apuntan que poderían recibir algunha sanción económica por estes feitos. Non puidemos concretar si algún dos outros partidos vai presentar denuncia ante a Xunta Electoral de Zona.
Unha xornada tranquila
Na xornada do mércores a Asociación Comercio Punto Compostela mantivo un novo encontro cun dos candidatos á alcaldía de Santiago. En este caso Goretti Sanmartín do BNG pero xa pasaron pola Galiciana, onde se realizan os encontros, Borja Verea e María Rozas. O ciclo pechará este venres co actual alcalde Xosé Sánchez Bugallo.
O Partido Popular reuniu en Compostela aos 29 membros da candidatura nun encontro previo ao comezo da campaña. Borja Verea foi mencionando en saudando un por un aos integrantes da mesma e poñendo un especial cariño con dous históricos como Evaristo Ben e David Pillado a quen definiu como a esencia do partido en Santiago.
Borja Verea falou de que era preciso “ter fame de transformar, de cambiar a cidade”. Arropado por María baleato, nº 2, e Nerea Barcia, nº7, apelou a súa experiencia e de María como interventores e secretarios para “poñer a funcionar a administración local de Compostela”.
O BNG avanzou onte as súas propostas en Compostela relacionadas coa diversidade e anunciou a creación dun servizo de asesoramento, orientación laboral e apoio LGTB. O BNG comprometeu tamén a adaptación de todos os formularios e documentos do concello á diversidade. Ademais de realizar accións “vencelladas ao resto de efemérides reivindicadas polo colectivo, como os días da despatoloxización e da memoria trans, os días da visibilidade bisexual, trans ou lésbica, así como a institución do día da visibilidade lésbica galega e do día contra a serofobia.
O candidato do Psoe, Xosé Sánchez Bugallo, reuniuse co Club Financieiro no que declarou que “É o momento dun novo salto, dunha gran transformación, promovendo vivenda pública, impulsando máis solo industrial e afrontando o reto da estación de mercadorías na Sionlla”. O actual alcalde propuxo ademais “especializar Uninova en captación de inversións e acompañamento de empresas ao tempo que se traballa para habilitar un procedemento de certificación de licencias”
Compostela Aberta falou onte de mobilidade e transporte para Santiago. Entre as propostas está a creación dunha rede de bicicletas eléctricas cunha “unha rede ampla de estacións de recollida, que cubran todo o ámbito urbano e con puntos en lugares estratéxicos como a intermodal, os aparcamentos disuasorios, e tamén a futura rede de vías ciclistas urbanas e interurbanas”.
Pensando nun modelo de mobilidade sostible e “blanda” , CP propón “por en marcha un programa para recuperar os sendeiros tradicionais e camiños reais, para conectar peonalmente lugares e aldeas do rural, servir de acceso a espazos naturais e históricos, e actuar como itinerarios de ocio para o conxunto da veciñanza”.
