O Bosque do Banquete de Conxo é unha das xoias da diversidade de Compostela e os traballos de recuperación abarcan distintas áreas. Ademais do mantemento do que hai, elimínanse especies invasoras e, como agora sucede, recupérase patrimonio.
En este caso trátase da antiga ponte do Cemiterio do Psiquiátrico. A concelleira de Dereitos e Servizos Sociais, Promoción Económica e Xuventude, María Rozas, vén de visitar o ámbito para coñecer o acondicionamento de novas pontellas e miradoiros na zona máis próxima ao Carballo de Conxo.
O proxecto do Ecobosque permitiu recuperar a antiga ponte do Cemiterio do Hospital Psiquiátrico de Conxo, construída arredor do ano 1900 e que permaneceu máis de 40 anos agochada baixo unha lousa de formigón colocada durante as obras do Hospital Provincial de Conxo para soportar o tráfico pesado.
A actuación actual permitiu retirar ese engadido e devolverlle á ponte o seu aspecto orixinal, recuperando a altura inicial do taboleiro e poñendo en valor a súa estrutura histórica, sempre con respecto polos materiais e pola configuración coa que foi construída.
Ademais, xa están ultimadas as novas pontellas sobre o río, novas pasarelas de madeira para facilitar o acceso ao paseo desde a rúa de Ramón Baltar, e tamén un miradoiro á altura do Carballo de Conxo. Estas actuacións forman parte dunha das liñas de acción do proxecto do Ecobosque para mellorar a conservación do Carballo de Conxo
O proxecto do Ecobosque do río Sar busca recuperar e poñer en valor o Bosque do Banquete de Conxo e o ecosistema fluvial do río Sar, e conta co apoio da Fundación Biodiversidade do Ministerio para a Transición Ecolóxica e o Reto Demográfico, cunha achega de máis de 870.000 euros de fondos europeos Next Generation.
Ao seu abeiro, realizáronse nunha primeira fase un estudo hidrolóxico e un inventario do ecosistema fluvial do río Sar ao seu paso polo Banquete de Conxo, dous documentos que avalaron a riqueza da zona e que serviron de base para as actuacións posteriores.
Entre elas, puxéronse en marcha campañas para a eliminación de especies invasoras como a tradescantia e o bambú, plantáronse especies autóctonas, moitas delas de maneira participada a través do método das bombas de semente; ou aprobouse un plan de gobernanza e participación co obxectivo de implicar activamente á veciñanza e fomentar a transparencia e a corresponsabilidade nas accións ambientais vinculadas a ese proxecto.
