Bisbarra, 23 de xaneiro do 2023 – O concello de Dodro denuncia a negativa da Secretaría Xeral de Deportes da Xunta de Galicia a solucionar os problemas do pavillón polideportivo municipal.
Desde o concello explícase que o pasado día 10, o concelleiro de Educación, Deportes e Emprego, Abel Tarrío, e o concelleiro de Cultura e Patrimonio, Xoám Xosé Vicente Franco, mantiveron unha reunión co Secretario Xeral, José Ramón Lete. O encontro, o terceiro nos últimos anos, tiña como obxectivo conseguir apoio económico para arranxar as cubertas do polideportivo municipal de Dodro.
A instalación, con 25 anos de antigüidade, atópase en moi mal estado. O custo, avaliado por un estudo técnico contratado para este tema, alcanza os 128.3139,79 euros. A proposta dos concelleiros ao Secretario Xeral supoñía unha inversión por parte do concello de algo máis de 55.000 euros, con cargo ao POS+ 2023 da Deputación. A Xunta só tería que aportar 72.000 €, un 56,8%.
A proposta de Dodro foi rexeita pese a que convenios como este foron asinados en multitude de concellos ao longo dos últimos anos. Lete emprazou aos concelleiros a presentarse a unhas subvencións de concorrencia competitiva. Ditas axudas sairían, segundo o Secretario Xeral, nun futuro, sin concretar data.
O concello de Dodro denuncia a discriminación que supón esta negativa. Explica as dificultades dun pequeno concello para afrontar por si só inversións de este calibre. O pavillón polideportivo de Dodro, engaden, é unha instalación fundamental do concello e seguirán buscando fórmulas de financiamento para arranxala.
