O goberno municipal defende a limpeza en tódolos procesos de concesión de licenzas “ante as falsas informacións, difundidas polo grupo político Unidade Veciñal de Dodro”.
A concesión dunha subvención de máis dun millón de euros a unha empresa cárnica de Dodro ven de desatar unha tormenta política. O grupo Unidade Veciñal de Dodro asegura nas súas redes que a empresa recibe a axuda “sen licenzas de obras do concello”.
Estas publicacións levaron ao goberno municipal de Dodro, socialista en minoría, a emitir un comunicado para desmentir e aclarar a situación. O equipo de goberno garante no comunicado a “limpeza en tódalas solicitudes de licenza”.
Di tamén que “a empresa Matadero del Sar, S.L. ten solicitado nos últimos meses distintos permisos de obra con distintas finalidades. Todas as licencias seguiron as canles e os procedementos habituais e a empresa pagou os impostos e taxas correspondentes. Algunha destas solicitudes está aínda sen resolver”.
Lembra ademais que os investimentos vinculados á concesión da axuda “non teñen que ser, como pretende dar a entender UVD, unha única obra e poden incluír a compra de maquinaria, mobiliario ou outro tipo de bens non suxeitos a canons municipais”.
Pódese sinalar que a propia natureza da axuda obriga a unha transparencia absoluta, unha contabilidade específica que reflicta unicamente o uso dos fondos e a presentación de toda a documentación precisa. Se parte dos fondos son destinados a unha obra, a empresa terá que presentar a licenza correspondente ou a solicitude da mesma.
O gobernó de Dodro defende por outra parte “que o investimento total da empresa Matadero del Sar SL en Dodro pretende alcanzar os 3.728.407,83 € polo que é de destacar que a parte privada é moi superior á pública”.
Finalmente pídenlle a Unidade Veciñal de Dodro que “non siga o camiño doutros grupos e se informe antes de publicar bulos que prexudican, máis ca ao grupo político que goberna, ao concello e a imaxe de rigor que calquera institución pública debe ter”.
