O concello de Dodro pídelle á veciñanza responsabilidade a hora de usar os contedores distribuídos polo municipio. A peitición ven dada porque en días pasados apareceron bolsas con lixo de todo tipo en algúns contedores verdes. Tamén hai semanas, no mesmo tipo de contedores, tiráronse restos de ramas e poda.
O concello lembra que “o papel e os envases teñen os seus propios contedores e un proceso de reciclaxe distinto ao do lixo que vai ao contedor verde”. Así mesmo o goberno de Dodro habilitou espazos en distintas parroquias para poder deixar os restos vexetais; residuos que serán posteriormente recollidos e tratados polo concello.
Ademais Dodro informa periodicamente da ubicación do punto limpo móbil que ofrece o concello e no que se poden deixar todo tipo de residuos especiais, desde pilas ou aparellos electrónicos, ata pinturas, vernices o mesmo aceite usado. Hai ademais un número de teléfono habilitado para a recollida de voluminosos.
Desde o equipo de goberno explican que “mesturar todo complica a xestión e tratamento do lixo aumentado o custo que paga o concello e, en consecuencia, facendo que sexa aínda máis deficitario. A separación e a reciclaxe, ademais do coidado do que temos, é unha tarefa comunal. É responsabilidade de todos e de cada un a limpeza do concello e o bo uso dos servizos que pagamos entre todos”.
Desde o concello prégase á veciñanza que faga bo uso dos servizos e colabore a ter un concello de Dodro que recicle cada vez máis e mellor e no que a limpeza sexa exemplar.
