Bisbarra, 13 de decembro do 2024 – A programación de Nadal en Dodro dará comezo este sábado cun dos actos culturais máis emblemáticos do municipio, a entrega do XXXVII Premio de Poesía Eusebio Lorenzo Baleirón.
En esta edición recibe o galardón o poeta Miguel Cavadas pola súa obra “Himno nacional”. A cerimonia celebrarase ás 17.30 horas, no CPI de Dodro e contará con recital poético e a actuación do músico Manoele de Felisa.
O venres, 20 de decembro, ás 20.00 horas na Igrexa de San Xián de Laíño, terá lugar un concerto solidario de Nadal a cargo do Coro Ludus Tonalis. Esta agrupación creada en 1998 interpretará “Lingua Nai”, proposta musical pertencente ao Programa da Rede Cultural da Deputación da Coruña. A entrada será de balde e en colaboración coa entidade Cáritas Dodro, solicitarase ao público a aportación solidaria de alimentos e produtos non perecedeiros para axudar as persoas e familias que o precisen.
O luns 23 de decembro, os Títeres da Compañía Larei Lará chegarán a Dodro para facer desfrutar ao público infantil co espectáculo “A cheminea do Apalpador”. A cita será ás 17.30 horas no Pavillón de Deportes.
Entre o 23 de decembro e o 3 de xaneiro, de luns a venres, os días hábiles, o Concello de Dodro ofertará á poboación o servizo “Concilia Nadal”. Un conxunto de actividades lúdico educativas para crianzas de 3 a 12 anos, pertencentes ao programa Corresponsables e ten como obxectivo axudar ás familias nas épocas de vacacións escolares de Nadal. Estas desenvolveranse na Casa da Cultura, entre ás 9.30 e as 13.30 horas.
O venres 27 de decembro, ás 17.30 horas e no Pavillón de Deportes, serán os “Monicreques de Sempre” de Pekexogo, os responsables do entretemento e diversión. Espectáculo incluído no Programa da Rede Cultural da Deputación da Coruña. Esta xornada lúdica rematará cuns inchables infantís e coa animación e visita de Papá Noel.
Como non podía ser doutro xeito pecharase o ciclo de Nadal o día 5 de xaneiro de 2025 coa recepción das SS.MM. Os Reis Magos. A cita será ás 17.30 horas, no Pavillón de Deportes, onde Dodro celebrará a visita dos Reis Magos con animación musical, inchables, chocolate con churros e cos mellores desexos e ilusión para o ano 2025.
