Bisbarra, 12 de decembro do 2023 – Os veciños de Dodro, es os políticos reclaman unha e outra vez ao SERGAS que repoña o médico que falta no centro de saúde.
O BNG de Dodro emitía unha nota de prensa este luns na que denunciaba unha vez máis os problemas de falta de persoal no centro de saúde. O voceiro nacionalista, Xoán Bautista Mariño, di que “sabemos que estanse presentando queixas e animamos a seguir cubrindo reclamacións ata que se solucione o problema”.
Unanimidade dividida
O resto de forzas políticas coinciden a hora de reclamar solucións á falta de médico pero cada un o fai dun xeito distinto. Desde o concello, en mans do partido socialista, informase que se están presentando ante o SERGAS todas as reclamacións e peticións necesarias sen que polo momento haxa resposta.
O Partido Popular aseguraba este luns nas súas redes sociais “No día de hoxe reunímonos con Eloina Núñez Masid, xerente da área sanitaria de Santiago e Barbanza para trasladarlle a situación actual do Centro de Saúde de Dodro”. Os populares engadían que “Solicitámoslle cubrir a praza dunha médica titular xa que a súa substituta fai uns días que deixou o posto. Están traballando niso e esperamos unha pronta solución”.
Por outra banda Unidade Veciñal de Dodro queixase da desunión dos partidos e busca cambiar a situación cunha concentración “Dende a Unidade Veciñal de Dodro mantemos a convocatoria para toda a veciñanza o próximo xoves 14 ás 18h. e mantense aberta a calquera iniciativa que vaia encamiñada a loitar pola defensa do centro de Saúde de Dodro”.
Problemas na bisbarra
En toda a bisbarra os problemas de falta de persoal engádense aos estruturais. Cando non hai substitutos é o edificio o que precisa arranxos. Frades, A Baña, Santa Comba, Dodro… son os máis recentes pero antes xa pasou en Negreira, Teo ou Ordes.
