PP, Unidade Veciñal de Dodro e Xente de Dodro tumbaron a suba da taxa do lixo obrigando ao concello a incumprir a lei. Por outra banda aprobouse a suba do abastecemento, saneamento e servizos deportivos
O pleno ordinario de Dodro deixou contradicións sobre as necesidades de manter os servizos e acatar a lei. Os mesmos que defenderon a suba dunhas taxas votaron en contra do incremento da única que era obrigada por lei.
O pleno xa se presentaba como unha incognita ao estar en minoría o goberno socialista de Xabier Castro. Unidade Veciñal de Dodro e BNG, socios de coalición no anterior mandato tiñan na man as subas e, en consecuencia, os recursos económicos para manter en parte ese servizos.
O primeiro foi o do abastecemento e as forzas progresistas mantiveron a unidade e votaron a favor cos mesmos argumentos. O incremento de prezo equivalente á suba do IPC está recollida no contrato e non ofrece moita dúbida.
Sen embargo Xente de Dodro e PP, antigamente baixo as mesmas siglas populares, votaron en contra. Unha decisión que sorprende por incoherente xa que o contrato foi asinado por eles cando gobernaban. Só Xente de Dodro suxeriu deixalo para máis adiante e aprazalo, sen dicir que o ano que ben o IPC pode volver a subir polo que de pouco serviría.
O mesmo resultado e os mesmos argumentos no caso da taxa de saneamento. PP e Xente de Dodro volveron a votar en contra co argumento de non cargar aos veciños con máis custos. O alcalde, Xabier Catro, lembroulles que eles tamén subiran os prezos en máis dunha ocasión mentres gobernaban baixo unhas mesmas siglas. Ademais de insistir en que son subas recollidas no contrato que eles asinaron.
O incremento das taxas por servizos deportivos tamén foron aprobadas cos votos do equipo de goberno do Psoe, Unidade Veciñal e BNG. Unhas taxas que non se actualizaban desde o 2014 e que ademais son deficitarias en 45.000 euros. PP e Xente de Dodro volveron a votar en contra.
Taxa do lixo
Foi a taxa do lixo a que non puido saír adiante polo voto en contra de Unidade Veciñal de Dodro que insistiu en que antes de levar a taxa a pleno terían que telo consensuado con eles. Unha taxa que está subindo en tódolos concellos e que, como lembraron o alcalde, Xabier Castro, e o Tenente de alcalde, Ramón Abuín, é consecuencia da subida de prezos de SOGAMA e dunha lei que impide que sexa deficitaria.
A perda da votación leva ao goberno socialista a incumprir a lexislación, sen que se saiba moi ben que consecuencias pode ter. Por outra banda isto obrigará a reducir outras partidas e, en consecuencia, outros servizos.
Xosé Ramón Reboiras Noia fillo predilecto a título póstumo
O pleno do concello Dodro aprobou tamén por maioría absoluta, a declaración de fillo predilecto a título póstumo de Xosé Ramón Reboiras Noia, cando se compren 50 anos do seu falecemento. Moncho Reboiras naceu en Imo, na parroquia de San Xoán de Laíño e foi un sindicalista e opositor á ditadura franquista.
Tras estudar e vivir en Vigo trasladase a Ferrol e comeza a traballar en Astano e a impulsar a Fronte Cultural Galego, un dos catalizadores culturais naquel momento en Galicia. Ao tempo mantivo a súa loita sindical e a defensa dos traballadores como membro da UPG.
En agosto de 1975 morre tiroteado pola policía franquista nunha rúa de Ferrol, a súa morte provoca o exilio de moitos compañeiros a Portugal onde acababa de triunfar a revolución dos caraveis. O concello de Dodro organizará proximamente un acto onde se entregará a distinción á familia.
