A ausencia de tres concelleiros da Unidade Veciñal de Dodro, a abstención do PP e o apoio do BNG e do PsdeG (gobernando en minoría) posibilitou a continuidade do Servizo de Axuda no Fogar
Traballar en minoría obriga aos concellos nos que o goberno municipal está en esta situación a facer equilibrios en cada pleno. O Servizo de Axuda no Fogar é xa un servizo imprescindible en Dodro e en calquera outro municipio.
No pleno ordinario de marzo o goberno socialista de Xabier Castro conseguiu in extremis, e co apoio do BNG; aprobar a nova licitación do servizo. Os seus socios de goberno na anterior lexislatura, Unidade Veciñal de Dodro, votaron en contra xa que demandaban unha municipalización imposible de asumir polo custo do persoal” segundo o equipo de goberno.
O argumento de Xente de Dodro para votar en contra foi moito máis radical, e absurda. O voceiro, Valentín Alfonsín Somoza (membro do PP ata esta lexislatura) avanzou desde o primeiro momento que “ a súa norma é votar en contra de todo”. Somoza sen embargo quedouse só no pleno xa que os outros tres concelleiros do seu grupo non asistiron por razóns descoñecidas.
Pola súa banda o Partido Popular viña reclamando esta licitación desde hai tempo e optou pola abstención o que tamén posibilitou a aprobación. Desde o equipo de goberno o alcalde, Xabier Castro, indica que “A non aprobación de este procedemento tería sido un problema grave para os veciños e veciñas do concello, xa que suporía un parón nun dos servizos máis demandados no concello. Agora poderá comezar un proceso que rematará coa adxudicación do SAF”.
O pleno aprobou tamén unha modificación de crédito e un recoñecemento extraxudicial de crédito, relacionados coa xestión e o pago do SAF. No apartado de mocións o BNG conseguiu o apoio da corporación para un recoñecemento ás cantareiras do municipio.
