O resultado non variou as previsións e concretouse cos votos esperados. A oposición de Dodro ten agora trinta días para presentar unha moción de censura ou os orzamentos quedarán aprobados definitivamente.
O equipo de goberno de Dodro poderá ter os orzamentos aprobados en trinta días. O pleno extraordinario de este mércores rematou coa perda da cuestión de confianza polo goberno municipal, pero tamén deixou claro que na oposición non se dan as condicións para unha moción de censura.
O único apoio recibido polo goberno socialista en minoría foi do BNG. Os nacionalistas mostraron, segundo as súas palabras, coherencia xa que “si apoiamos o orzamento por incluír parte das nosas propostas, ou apoiamos a Relación de Postos de Traballo que levabamos pedindo anos; non podemos deixar de apoiar esta cuestión de confianza”.
O resto dos grupos repetiron esquemas e argumentos doutros plenos, mesmo actitudes. O discurso máis ultra foi o da Agrupación Política Xente de Dodro. O seu voceiro, Valentín Alfonsín Somoza, (que marchou do PP e montou este partido ao ser descartado como candidato) volveu a lanzar todo tipo de acusacións, sen argumentos ou presuntamente mentindo, ao goberno de Dodro pero tamén a Unidade Veciñal de Dodro.
O Partido Popular centrou as súas críticas en temas como o lixo ou os servizos sociais. O que máis sorprendeu foi a afirmación de que a fórmula de vincular os orzamentos a unha cuestión de confianza era legal pero non democrática, algo difícil de entender.
Unidade Veciñal de Dodro fixo un longo e pesado repaso polo seu traballo na anterior lexislatura e polas peticións realizadas ao longo desta para concluír que non podía apoiar ao goberno xa que non se tiveran en conta esas demandas.
O alcalde, Xabier Castro, respondeu a todas estas críticas e en especial a Xente de Dodro, a cuxo voceiro tivo que advertir que moderara a linguaxe e a actitude. Castro lembroulle, entre outras cousas, que “presentou unha querela criminal contra cinco concelleiros, o alcalde e dous traballadores que foi sobreseída e que costará ao concello máis de 13.000 euros”.
O alcalde de Dodro rematou o pleno lembrándolle a oposición que ten 30 días para presentar unha moción de censura, algo qe visto o pleno parece moi difícil que se dea.
