Bisbarra, 17 de ullo do 2024 – A Xunta de Goberno Local de Dodro aprobou o V Plan de Igualdade que terá vixencia ata o vindeiro ano 2027.
O Plan de Igualdade de Dodro divídese en 5 áreas máis unha sexta específica destinada ao movemento LGBTI+ . O documento divide o traballo nos ámbitos educativos, de emprego, social, institucional e da igualdade, da violencia de xénero e das violencias machistas.
O sexto responde a unha necesidade imperiosa da nosa sociedade: a incorporación da igualdade real e efectiva das persoas trans e para a garantía dos dereitos das persoas LGBTI+ .
Coa aprobación deste documento, que será presentado polo alcalde Xabier Castro, e pola concelleira de Igualdade Teresa Batalla nos vindeiros días, nun acto aberto ao público no salón de actos do Concello, “reafírmase o noso compromiso inquebrantable coa equidade e coa xustiza, sendo construído sobre as bases sólidas establecidas no plan anterior, mantendo e ampliando as accións que demostraron ser efectivas”, tal como expresou Francisco Xabier Castro Tourís, Alcalde do Concello de Dodro.
A actuación foi financiada polo Concello de Dodro a través dos fondos recibidos polo Pacto de Estado contra a violencia de xénero para o exercicio 2023.
