Bisbarra, 6 de maio do 2024 – O concello de Dodro ven de presentar a programación vinculada ao Día Das Letras Galegas que inclúe actividades de todo tipo.
Unha programación pensada, explican desde o concello de Dodro, para fomentar o uso do galego e chegar a un público familiar. Unha serie de actividades que se desenvolveran en distintas xornadas ata finais de mes.
A celebración das Letras Galegas comezará en Dodro o xoves 16 cun contacontos a cargo de Iolanda Eiras. “Fogar de cores” ten como obxectivo fomentar o uso do galego e visibilizar os distintos tipos de familia que hai na sociedade actual. Esta actividade celebrarase ás 17.30 horas, na Casa da Cultura.
O venres 17, Día Das Letras Galegas, ás 17.30 horas no o CPI de Dodro, o gañador do XXXVI Premio de Poesía Eusebio Lorenzo Baleirón, Manuel López Rodríguez, presentará a obra vencedora “As palabras do sur”. Estará acompañado por un representante da editorial Chan da Polvora, encargada do deseño e impresión do poemario, ademais de representantes municipais, familiares e veciños.
O martes 21 de maio inaugurarase a exposición fotográfica “Escenas da memoria de Dodro”. Esta mostra reúne imaxes antigas da vida comunitaria do municipio e estará accesible ao público de luns a venres, entre ás 9.00 e as 14.00 horas na Casa do Concello.
A programación das Letras Galegas rematará o venres 24, ás 17.30 h na Casa da Cultura, coa representación da obra “Isaura e Tristán. Contastorias” de Inacio Vilariño de Fantoches Baj. Trátase dunha peza teatral de monicreques para público familiar baseado no traballo de Luísa Villalta “As chaves do tempo”. Unha novela de ficción histórica que se corresponde co último libro da autora homenaxeada en este 2024.
