Bisbarra, 13 de novembro do 2023 – O concello de Dodro pon en marcha o concurso de fotografía “Calendario Municipal 2024” co obxectivo de recuperar imaxes antigas do municipio.
O concello busca recuperar antigas imaxes do municipio coa colaboración dos veciños. Imaxes que poidan estar nas casas e por en valor o patrimonio cultural, histórico, natural e paisaxístico de Dodro. De estas fotografías seleccionaranse 12 para o calendario anual que edita Dodro.
Poderán participar todas as persoas, maiores de 18 anos, que o desexen. Cada participante poderá presentar un máximo de 3 fotografías. O formato será apaisado, en branco e negro ou sepia e enviaranse nomeadas cun título ou frase que as describa.
Os participantes enviarán as imaxes ao correo info@dodro.gal seguindo as indicacións das bases. As persoas que non dispoñan de medios electrónicos poderán empregar o equipamento da aula de informática municipal da Casa da Cultura para a dixitalización e presentación das imaxes e documentos precisos.
O prazo de presentación de imaxes rematará o vindeiro 24 de novembro. O xurado estará formado por representantes municipais, técnicos da área de cultura e un profesional da fotografía, publicidade ou xornalismo. Os gañadores recibirán como premio cinco exemplares do calendario que se edite.
As bases do concurso “Calendario Municipal 2024” estarán publicadas na web municipal e incluirán a folla de inscrición.
