Bisbarra, 15 de novembro do 2023 – O BNG de Dodro ven de emitir un comunicado no que mostra a súa preocupación pola situación das persoas dependentes e pide que se realice a contratación que deixou preparada na anterior lexislatura.
Desde o goberno municipal infórmase que se está traballando nos pregos do concurso. Lembran ao mesmo tempo que este tipo de contratacións non é a primeira vez que quedan desertas e o obxectivo é que iso non suceda.
O voceiros nacionalista, Xoán Bautista Mariño, era na anterior lexislatura o concelleiro de servizos sociais. No comunicado explica que daquela “estudou todas as vías para a mellor xestión ou incluso a municipalización do servizo, e rematar coa situación irregular herdada do PP, que non renovou o contrato en prazo”.
No último pleno de Dodro Mariño indicou que “o servizo de SAF Dependencia do que se desentende a Xunta é un servizo impropio dos concellos, pero que atenden con moito esforzo municipal toda Galiza”.
A Xunta só aporta 12 €/h. E usuario e concello poñen o resto. Polos custos de persoal, as constantes altas e baixas, e os orzamentos do concello o BNG chegou a conclusión de que non era posible municipalizalo e preparou uns pregos para licitar o servizo.
Pola súa banda o alcalde de Dodro, Xabier Castro, remítese ao dito no pleno. Explica que se traballa na revisión dos pregos técnicos e administrativos e engade que “Concellos veciños sacaron fai pouco tempo o servizo a concurso, e en algún caso este quedou deserto, xa que ningunha empresa se presentou para conseguir este contrato”.
O goberno de Dodro está ademais mantendo reunións cos concellos veciños “para explorar tamén a posibilidade de mancomunar este servizo e que o concurso non sexa só para Dodro, xa que así sería máis atractivo para as empresas. Agrupar horas e traballadores e garantir calidade e emprego”.
