Bisbarra, 25 de xaneiro do 2023 – O concello de Dodro ven de asinar un convenio coa Deputación da Coruña para impulsar a mobilidade sostible no municipio.
O presidente da Deputación, Valentín González, e o alcalde, Xavier Castro, rubricaron o acordo que permitirá acondicionar un viario nas Brañas de Laiño, un espazo que forma parte da Rede Natura 2000.
O orzamento total da execución ascende a 129.639 euros, dos que a entidade provincial aporta o 80 % da financiación, que supón 103.711 euros, e a administración local a cantidade restante, que son 25.928 euros.
Xabier Castro explica que “a vía conta con preto de 7 quilómetros de lonxitude e atravesa o municipio desde a Veiga de Lestrove, no límite con Padrón, ata Bexo, preto de Rianxo, discorrendo en boa parte polo entorno natural das Brañas de Laíño”. Trátase dunha vía que xa é moi usada polos ciclistas actualmente.
Castro agradeceu o apoio da Deputación “para facer realidade un proxecto moi bonito co que pretendemos impulsar a mobilidade a pé e en bici en condicións de seguridade e accesibilidade”.
Pola súa banda, o presidente provincial, Valentín González, enmarcou este proxecto “na aposta por un novo modelo de mobilidade sostible que estamos a realizar desde a Deputación, e que inclúe grandes obras como a Vía Verde Santiago – Cerceda ou a Senda ZEC do entorno do encoro de Cecebre, pero tamén proxectos coma este, que pretenden fomentar a mobilidade a pe ou en bici entre núcleos rurais de concellos coma Dodro”.
As obras contemplan a delimitación das marxes da vía con zonas de protección e prioridade para o tráfico ciclista, que tamén serán empregadas polos peóns, mellorando a seguridade e a funcionalidade para todos os usuarios e usuarias.
Realizarase ademais unha sinalización completa horizontal e vertical, e instalaranse 21 redutores físicos de velocidade para os automóbiles tipo “lombo de asno”, como medida para regular o tráfico.
Do mesmo xeito repararase o firme existente mediante a colocación de grava e tratamento asfáltico semiprofundo. Selarase toda a superficie en dous tramos acotados do viario. Estas actuacións completaranse coa canalización soterrada de 400 metros para colocar a iluminación pública, que inclúe 19 luminarias sobre báculos de 5 metros de altura, e a instalación de 5 bancos de madeira técnica.
