Bisbarra, 11 de xuño do 2024 – A Dirección Xeral do Patrimonio Cultural continuará con novos traballos de escavación, musealización e conservación do xacemento arqueolóxico do castro de Doade.
Os traballos continuarán nunha zona habitacional, con estruturas de pedra circulares e buracos de poste, que foron obxecto de consolidación e posta en valor parcial. Desde a Dirección Xeral de Patrimonio explícase que é preciso continuar a escavación arqueolóxica no Castro de Doade para revisar e completar a súa posta en valor, dotando aos restos dun discurso máis unitario.
O xacemento arqueolóxico do Castro de Doade, propiedade na súa maior parte do Museo Etnográfico “Casa do Patrón”, foi obxecto entre os anos 2015 e 2020 de varios proxectos de actuación arqueolóxica, contando cunha Colección Visitable e abudantes actividades das que falamos en Lindeiros a miudo.
Desde o ano 2015, se levaron a cabo 7 actuacións arqueolóxicas promovidas polo Museo Etnográfico; e desde o ano 2016 colabora coa Universidade de Santiago de Compostela, USC, nas prácticas de alumnos do máster, que ademais apórtanlle soporte científico. No ano 2016, a Consellería de Cultura colaborou nun proxecto neste castro, mediante un Convenio de colaboración asinado coa USC para realizar unha escavación en área e a consolidación dunha cabana.
A nivel de protección, o xacemento do Castro de Doade, ou Aurela do Castro, GA36024037, figura no vixente catálogo de protección do PXOM de Lalín polo que, segundo a disposición adicional 2ª da Lei 8/1995 do patrimonio cultural de Galicia, se atopa incluído no Inventario do Patrimonio Cultural.
Os principais obxectivos desta 8ª campaña arqueolóxica no castro de Doade son, a nivel científico, poder facilitar unha comprensión global da zona habitacional do castro rematando e estudando algunhas zonas pendentes de escavar.
No campo da protección, realizar unha limpeza integral da zona e contorna, tomando as medidas necesarias para evitar o futuro crecemento incontrolado da vexetacióne e mellorar a conservación do xacemento, renovando o discurso expositivo do mesmo.
Xa no eido da difusión, potenciar o aproveitamento do castro de Doade como recurso cultural, social e turístico, mediante a realización de visitas libres e guiadas, que continuará organizando a Casa do Patrón, durante todo o ano, apoiadas con vídeos e fotos diarias de difusión e un vídeo resumo ao final das actuacións realizadas e dos achados localizados, así como a implantación dunha aplicación de realidade aumentada, utilizando códigos QR colocados nos numerosos carteis informativos existentes, que igualmente serán actualizados.
