Vista áerea do Hospital Provincial de Conxo en Santiago, imaxe Google Maps
Compostela, 08/07/2026 – As altas temperaturas están xerando problemas en todo o país. Nas casas cada un apaña como pode pero en escolas públicas ou hospitais como o provincial de Conxo en Santiago, isto é algo que non debería suceder.
O Secretario Xeral dos socialistas de Compostela, Aitor Bouza, denuncia que, lonxe de arranxar o problema, a algúns pacientes “díxoselles que trouxeran o seu propio ventilador”. Bouza engade á crítica que “a área sanitaria Santiago-Barbanza volva ser noticia polas condicións absolutamente inhumanas”.
O dirixente socialista criticou que o Goberno galego leve semanas “vendendo a obra de Conxo como se xa estivera finalizada, como se fora un éxito”, nun exercicio de propaganda que, ao seu xuízo, volve chocar coa realidade que sofren os pacientes.
A resposta da Consellería de Sanidade, lonxe de resolver o problema, agrava aínda máis a denuncia socialista. Bouza censurou que, en vez de rectificar, poñer solucións e garantir a dignidade das persoas ingresadas, “a única solución que lles deu aos pacientes de Conxo foi optar porque poden traer eles mesmos o seu propio ventilador”.
“É absolutamente vergoñento”, afirmou o deputado socialista, que acusou á Xunta de trasladar aos pacientes a responsabilidade de soportar unha situación que debería estar resolta pola administración sanitaria. Para Bouza, “ese é o sistema que está promovendo o Partido Popular en Galicia, o sistema sanitario que quere implementar en Santiago de Compostela”.
O secretario xeral do PSdeG de Santiago anunciou que as e os socialistas levarán esta cuestión ao Parlamento de Galicia. “Non o imos a permitir”, asegurou Bouza, que reclamará “que se culmine canto antes xa todas esas obras para que o sistema de climatizaciónno Provincial de Conxo sexa unha realidade e non soamente unha promesa”.
O deputado socialista advertiu de que non se pode permitir que “haxa pacientes de primeira e pacientes de segunda”. Por iso, esixiu ao Goberno autonómico que deixe de mirar cara outro lado e actúe con urxencia para garantir unha atención sanitaria en condicións.
Para rematar, Bouza reclamou unha sanidade pública forte, con recursos e capaz de atender con dignidade á cidadanía, fronte a un Goberno galego que, segundo denunciou, volve deixar “tirados e tiradas a todos os compostelás e composteláns e a toda área de influencia que precisan dunha sanidade pública en calidade”.
