O Concello de Padrón desenvolverá o vindeiro día 23 unha programación especial con motivo do Día de Rosalía. Unha xornada de especial relevancia no municipio por acoller á Fundación da Poetisa e a súa casa natal.
A Día de Rosalía en Padrón comezará ás 10.00 horas cunha saída desde a rúa do Sol ata a estatua de Rosalía no Espolón. O acto incluirá unha alborada cos Carapaus e a lectura de poemas por parte do alumnado dos IES Camilo José Cela e Macías o Namorado..
Ás 14.00 horas, un total de 18 establecementos hostaleiros da vila ofrecerán a tradicional degustación do Caldo de Gloria, consolidada xa como unha das iniciativas máis representativas desta celebración. Ao mesmo tempo, Padrón Turismo impulsa a actividade Café con Verso, na que 16 establecementos repartirán tarxetas con versos de Rosalía, contribuíndo á difusión da súa obra.
O Concello de Padrón estará representado nos actos institucionais que se celebrarán en Santiago de Compostela e na propia Casa de Rosalía. Ás 11.00 horas terá lugar unha ofrenda na Praza de Vigo, ás 12.00 horas acto institucional no Panteón de Galegos Ilustres (San Domingos de Bonaval), con lectura de poemas e actuación musical ademais de degustación do Caldo de Gloria.
Xa pola tarde, na Casa de Rosalía en Padrón, celebrarase ás 19.00 horas unha degustación do Caldo de Gloria con Iago Pazos (Abastos 2.0) e bolos do pote elaborados por mulleres de Mazaricos, rematando a xornada cun concerto de Uxía e Javier Ruibal no auditorio ás 20.00 horas.
