Bisbarra, 25 de setembro do 2023 – O presidente da Deputación da Coruña, Valentín González, visitou durante dous días Irlanda para buscar xeitos de colaboración e promocionar o Camiño de Santiago.
A Deputación espera replicar en Irlanda o éxito que está a ter o Camiño Inglés entre os visitantes do Reino Unido e destaca os vínculos históricos coa illa esmeralda a través dos séculos
González Formoso estivo acompañado polo deputado provincial Antonio Leira, e o presidente da Asociación de Concellos do Camiño Inglés, Manuel Mirás. Formoso destacou que esta primeira viaxe oficial da Deputación “ten como obxectivo estreitar lazos de colaboración coa República de Irlanda e traballar conxuntamente na promoción deste Camiño en ambos países”.
O Camiño Celta é unha ruta xacobea aínda bastante descoñecida, que conta con distintas rutas oficiais de peregrinaxe no país, todas elas cun traxecto mínimo de 25 quilómetros, que desembocan nos portos de Dublín, Drogheda, Limerick, Cork ou Waterford, desde onde os peregrinos se dirixen por mar ata Galicia para completar cando menos outros 75 quilómetros a pé desde A Coruña ou Ferrol ata a catedral de Santiago de Compostela.
O Camiño de Boyne Valley
Na primeira xornada desorazáronse ata Drogheda, unha das poboacións máis antigas de Irlanda, situada uns 25 quilómetros ao norte de Dublín, para inaugurar o Camiño de Boyne Valley, unha das rutas máis populares e históricas das que compoñen o Camiño Celta. Nesas rutas poden atoparse xa algunhas sinais coa frecha e a cunha amarela que indican o Camiño cara Santiago de Compostela.
O percorrido incluíu unha andaina desde a abadía de Mellifont, a 2.580 quilómetros de Santiago, o primeiro mosteiro cristián do país, fundado en 1142, e a visita a distintos puntos da cidade vinculados ao Camiño. Entre outros, visitaron a igrexa de St. Peter, a Highlanes Gallery ou a oficina de turismo local.
A axenda incliu tamén un almorzo coas autoridades locais e rexionais no que participaron Thomas McEvoy e Colette Moss, director e representante consello do Condado de Louth, Ged Nash, deputado no Parlamento Irlandés e Hubert Murphy, presidente da Cámara de Comercio, entre outros.
Valentín Formoso incidiu no “nexo histórico e cultural que, a través dos séculos, une a Galicia e Irlanda, dúas terras irmás” e anunciou o compromiso da Deputación da Coruña de “activar iniciativas que potencien o coñecemento desta ruta tanto en Irlanda como en Galicia, estreitando estes lazos históricos entre as nosas comunidades para conseguir que Irlanda esté un pouco máis preto de Santiago de Compostela”.
Inauguración da primeira moteira
Na segunda xornada da viaxe o presidente Valentín González Formoso e o embaixador de España en Irlanda, Ion de La Riva Guzmán, participaron en Bray no acto oficial de inauguración da primeira mouteira de pedra que indica o Camiño de Santiago en Irlanda. No acto participaron tamén a alcaldesa Melanie Corrigan e a xefa do executivo do condado de Wicklow, Aoife Flynn Kennedy, entre outras autoridades locais, que agredeceron a presenza da delegación española “nun acto moi simbólico e importante”.
Formoso mantivo previamente unha reunión co embaixador na que se interesou pola poboación galega que vive en Irlanda, polas relacións comerciais en sectores estratéxicos como a pesca e por localidades coma Castletownbere, onde residen de forma permanente un elevado número de galegos e onde recalan os numerosos buques galegos que faenan nas augas do Gran Sol.
Galicia, máis preto de Irlanda
O embaixador De la Riva e o presidente da Deputación acordaron tamén colaborar na posta en marcha de diferentes actividades orientadas a promocionar Galicia en Irlanda. Entre elas, a celebración, o próximo 25 de xullo, do Día de Galicia nos xardíns exteriores da embaixada con actividades culturais, gastronómicas e festivas que a Deputación promoverá para dar a coñecer Galicia como destino turístico entre a poboación irlandesa.
Para promocionar Galicia en Irlanda, a Deputación e a embaixada traerán á provincia da Coruña a personalidades irlandesas do mundo da cultura, a empresa, os medios de comunicación e o sector turístico co fin de que coñezan en primeira persoa a historia común que une a ambos territorios e percorran o Camiño Inglés e o Camiño Fisterra-Muxía, as dúas rutas xacobeas que discorren integramente en territorio da provincia da Coruña e que experimentaron un importante crecemento en número de peregrinos nos últimos anos.
Formoso e De la Riva abordaron tamén a posibilidade de colaborar no futuro entre o condado de Sligo, onde diversas asociacións de memoria histórica manteñen viva a memoria do naufraxio da Armada Invencible en 1588 e o futuro Museo dos Naufraxios de Camariñas, que será financiado pola Deputación na localidade.
