Compostela, 8 de novembro do 2023 – A Deputación contribuirá economicamente a dotar de equipamento e promover a actividade do Centro de Servizos Innovadores para Empresas Biotecnolóxicas (CSIEB).
Así o avanzou a deputada de Industria, Deputación , Rosa Ana García, que visitou o Biopolo da Sionlla. A responsable estivo acompañada por José Fernández Albores, Presidente da Asociación Área Empresarial do Tambre, e o seu xerente, José Manuel Beceiro.
O Polo de Innovación en Biotecnoloxía
O Polo biotecnolóxico de Galicia desenvolverase a través de dúas infraestruturas complementarias nos seus obxectivos. A primeira delas, un Edificio de Espazos Industriais, formado por naves de carácter industrial de aproximadamente 500 m2 para empresas en fase de consolidación, completamente adaptadas aos seus requirimentos técnicos, loxísticos e de seguridade..
A segunda destas infraestruturas será o Centro de Servizos Innovadores para Empresas Biotecnolóxicas (CSIEB), que ofrecerá e proverá de servizos especializados a empresas do sector e que contará con laboratorios, equipamento e instalacións para o seu uso temporal e tarifado a prezos de mercado, así como a prestación doutra tipoloxía de servizos asociados á dixitalización do sector biotech galego.
Rosa Ana García avanzou que a Deputación facilitará o equipamento para a mellora da eficiencia enerxética, para as salas de uso común, para a mellora das telecomunicacións, como os accesos dixitais dos laboratorios e a adquisición de equipamento para laboratorios. En canto ás actividades, o organismo provincial posibilitará a promoción do Centro e a implantación de empresas biotecnolóxicas.
O proxecto deste Centro ten a súa orixe no Acordo da Sionlla do que forman parte a Xunta de Galicia, a través das consellerías de Economía, Empresa e Innovación e a de Medio Ambiente, Territorio e Vivenda, o Concello de Santiago de Compostela, a Universidade de Santiago de Compostela, a COCIN de Santiago de a Asociación Área Empresarial do Tambre.
Rosa Ana García destacou o “carácter estratéxico do polo, situado na comarca de Santiago, onde a Universidade conta cun grao específico de formación universitaria en biotecnoloxía e localízanse tamén os centros de investigación Ciqus (Centros Singular de Investigación en Química Biolóxica e Materiais Moleculares) e Citius (Centro Singular de Investigación en Tecnoloxías Intelixentes)” da USC.
Visita a empresas instaladas
Durante a visita, a deputada tamén tivo a oportunidade de coñecer as actividades de SunRock Biopharma, unha das empresas xa instaladas no CSIEP, a través do seu xerente, Juan Buela Fernández, quen destacou a importancia de crear sinerxías dentro das propias empresas do sector. SunRock Biopharma é unha compañía de biotecnoloxía dedicada ao desenvolvemento de anticorpos para o tratamento de tumores altamente invasivos con necesidades urxentes de terapias oncolóxicas.
Santiago e a súa área de influencia gañan cada vez máis peso na biotecnoloxía, unha actividade cun ritmo de crecemento do 10% anual, o que indica un gran potencial de futuro. A cidade e a súa contorna aglutinan a medio centenar de empresas, que facturan 65 millóns e dan traballo a unhas 350 persoas. As compañías compostelás destacan en diferentes subsectores como a alimentación funcional e nutracéutica para a saúde e o envellecemento activo; as novas tecnoloxías para a medicina personalizada; a produción de fármacos e vacinas; a xestión e aproveitamento dos recursos mariños; o medio ambiente, a economía circular ou a produción e aproveitamento agropecuario e forestal.
