Bisbarra, 18 de setembro do 2023 – O patrimonio natural que acolle a Serra do Careón será posto en valor grazas ao acordo ao que chegaron a Deputación provincial e a Universidade de Santiago, USC.
A Zona de Especial Conservación, ZEC, Serra do Careón é un dos espazos protexidos de maior singularidade edáfica e botánica da provincia. Ten un tamaño de 6.661 Ha. e representa o 8% da superficie total protexida na Coruña. Localízase entre os concellos de Melide, Santiso e Toques aínda que tamén penetra no concello lucense de Palas do Rei.
A devandita serra ten especial relevancia natural pola súa biodiversidade da flora xa que foi declarada como unha das áreas máis importantes para a conservación vexetal de toda España. E aínda así, e pouco coñecida para a cidadanía coruñesa a pesar desta singularidade.
A Serra contén polo menos sete especies protexidas e tres delas non viven en ningún outro lugar do mundo. Isto é consecuencia na tipoloxía do chan e da súa composición química, formada por rochas de cor verde e escamado que se asemella a pel das serpes e por iso se denominan especies serpentinizadas.
O pleno da Deputación aprobou por unanimidade o convenio polo que destinará 50.000 euros, o 80% do orzamento total da iniciativa, que ascende a 62.000 euros, para financiar o proxecto científico que tenta cimentar o coñecemento cunha proposta de plan de conservación da Serra do Careón.
Entre as accións que contempla o proxecto da USC destacan a actualización do estado das especies CGEA, catálogo de especies vexetais de intereses, deseño e edición de material divulgativo, inventario de técnicas de restauración, cartografado de zonas de acción e elaboración final.
A Serra do Careón é unha das 53 Zonas de Especial Conservación (ZEC) que protexen de xeito global 375.558 ha en Galicia, 18 delas pertencen a provincia da Coruña.
