Tordoia, 19 de abril do 2021 – A Deputación da Coruña colabora co Concello de Tordoia na xestión do punto de atención de visitantes do dolmen de Cabaleiros.
O presidente do ente provincial, Valentín González Formoso, e o alcalde do municipio, Eduardo Antonio Pereiro Liñares, asinaron o convenio de cooperación para financiar este servizo.
O Dolmen de Cabaleiros forma parte do patrimonio provincial. Nos últimos anos a institución provincial realizou numerosas actuacións encamiñadas á protección, conservación, rehabilitación e posta en valor.
O servizo funcionará desde o 1 de xullo ao 30 de setembro, estando aberto o punto de atención os sábados, domingos e festivos en horario de 11:00 horas a 19:00 horas. As visitas guiadas ao espazo son de carácter gratuíto.
Ambas institucións buscan con este acordo o impulso de actividades educativas e didácticas no dolmen de Cabaleiros, así como a posta en valor do espazo.
