Os concellos poden facer as solicitudes á Deputación até o 21 de xaneiro de 2026 e a subvención máxima pode chegar aos 150.000 euros
A Deputación da Coruña ven de reunirse cos concellos da provincia para presenta a nova liña de axudas. Este programa está dotado cun millón de euros de investimento que poderá ser ampliable a dous millóns,
O deputado de Patrimonio e Contratación, Xosé Penas, mantivo un encontro cos representantes dos gobernos municipais para explicar a nova liña de subvencións destinada a actuacións de protección especial sobre o patrimonio cultural público ou de xestión municipal.
Na reunión, que contou tamén coa presenza do xefe de Servizo de Arquitectura, Daniel Beiras, e do xefe de Departamento de Patrimonio, Fernando Pérez, resolvéronse dúbidas dos concellos sobre o programa DP0045/2026, que conta cun orzamento dun millón de euros, ampliable até os dous millóns.
Principais características do programa
Esta liña de subvencións, aprobada mediante resolución de Presidencia e publicada no BOP o pasado 15 de outubro, está dirixida aos concellos de menos de 50.000 habitantes da provincia da Coruña e ten como obxectivo a protección, recuperación e conservación do patrimonio histórico-artístico e cultural municipal.
Entre os aspectos salientados da convocatoria, a Deputación indicou que as actuacións poderán recibir unha subvención máxima de até 150.000 euros e cubrir até o 80% do orzamento de gastos subvencionables, sempre que o investimento mínimo acade os 30.000 euros. O período de execución previsto abranguerá do 1 de xaneiro de 2026 ao 30 de xuño de 2027.
Penas explicou que se poderán acoller a este programa as intervencións en espazos públicos e inmobles con valor histórico-artístico, cultural, tipolóxico ou etnográfico declarados BIC ou catalogados, así como en centros urbanos históricos tamén declarados BIC.
Inclúense ademais actuacións sobre elementos de enxeñaría como pontes, pontellas ou camiños; sobre patrimonio marítimo, como peiraos, carpintarías de ribeira, salgadurías ou secadoiros; e sobre xacementos arqueolóxicos que incorporen accións de sinalética ou musealización.
As solicitudes serán avaliadas en concorrencia competitiva por un comité técnico composto por tres expertos en patrimonio, arquitectura e rehabilitación. Teranse en conta a relevancia e singularidade do patrimonio, a urxencia e o estado dos danos, a calidade da proposta técnica e a repercusión prevista da actuación. Para obter a condición de entidade beneficiaria será necesario acadar un mínimo de 50 puntos.
Durante o encontro, o deputado subliñou “a necesidade de actuar de xeito inmediato coa utilización de recursos suficientes para protexer e conservar adecuadamente o extraordinario patrimonio cultural da provincia da Coruña”, e expresou a preocupación da Deputación “pola situación de determinados bens que deben ser obxecto de protección inmediata”.
Os concellos interesados poden presentar varias solicitudes individuais por actuación, realizando toda a tramitación a través da plataforma SUBTEL.
