Bisbarra, 18 de outubro do 2022 – O presidente da Deputación da Coruña, Valentín González Formoso, reuniuse coa Asociación de Empresarios Terra de Melide, (ASETEM).
Un dos temas que marcaron o encontro foi a necesidade de dotar a Melide de solo industrial á vila. O máximo responsable da Deputación mostrou o seu apoio á demanda “para que non se produza unha fuga de empresas e para que poida haber oportunidades de xeración de emprego”.
Ante as dificultades para desenvolver o solo previsto no Plan Xeral municipal, barállanse dúas posibilidades que serían ampliar o polígono existente ou facelo nun novo emprazamento. Formoso expresou o seu compromiso de que a Deputación “implicarase, na medida en que as nosas competencias o permitan, no desenvolvemento dunha localidade que é capital comarcal, que ten moito dinamismo económico, moita presencia de autónomos e de empresas de certo calibre”.
No encontro participaron por parte de ASETEM o presidente e o vicepresidente da entidade, Manuel Vázquez García e Rodrigo Fernández Pombo. Por parte do concello estivo presente o primeiro tenente de alcalde de Melide, José Antonio Prado. Finalmente pola Deputación, ademais de Valentín González, estiveron os deputados Bernardo Fernández e Antonio Leira. A reunión enmárcase dentro dunha rolda de encontros cos sectores produtivos para a elaboración dos orzamentos provinciais de cara ao próximo exercicio.
O primeiro tenente de alcalde, José Antonio Prado, fixo referencia a que “a Xunta foi extremadamente clara no ano 2018 e no ano 2019 de que, onde está o Polígono actual, non se pode ampliar” e apostou como futuro emprazamento para desenvolver solo industrial dunha forma máis rápida“ un area próxima a onde irá o enlace coa autovía na estrada que vai a Santiso”.
Pola súa parte, Manuel Vázquez García expresou que “a mellor fórmula é a ampliación do polígono que hai pero, de non poder facelo aí, hai que executalo noutro lugar canto antes” “Non vai a vir unha empresa para Melide sen ter onde establecerse, co que acabará marchando para outro sitio”, comentou.
Preto de 100 postos de traballo creados en Melide
A reunión tamén serviu para falar dos programas provinciais de reactivación económica como o Plan de Emprego Local (PEL) ou o Plan Único e así, como explicou González Formoso, “saber se están dando resultado ou se hai algunha mellora que facer nas convocatorias”.
No caso do PEL, que con 12 millóns de orzamento é o maior programa de emprego impulsado por unha administración local en Galicia, este ano apoiou a contratación de máis de 1.000 persoas no sector público e privado e, no caso concreto de Melide, creáronse 89 postos nos últimos cinco anos a través deste plan.
Por último, puxéronse sobre a mesa outras cuestións de interese para o municipio, como a Autovía A-54 (de Santiago a Lugo) que está dotada de 54 millóns de euros nos orzamentos xerais do Estado para 2023. “Esta, concretamente o tramo de Palas de Rei a Melide, será unha infraestrutura estratéxica para desenvolver o municipio”, apuntou. Formoso.
