Ordes, 06/03/2026 – O presidente da Deputación da Coruña, Valentín González Formoso, e a deputada de Plans, Cristina García, visitaron o Concello de Ordes, onde foron recibidos polo alcalde, José Luis Martínez Sanjurjo, e polos portavoces dos grupos municipais da corporación.
No salón de plenos mantiveron un encontro institucional no que explicaron a importancia e fixeron balance do impacto do Plan Único (POS+) nos concellos da comarca de Santiago.
O presidente provincial salientou que a primeira achega do POS+2026 supón unha inxección de 25,3 millóns de euros para os concellos da comarca de Santiago, incluíndo “investimentos que permiten mellorar infraestruturas básicas, renovar servizos municipais e atender necesidades sociais, pero tamén de garantir o funcionamento diario dos concellos e a calidade de vida da veciñanza”.
Petición á Xunta
Formoso reclamou á administración autonómica que incremente este fondo ata acadar un mínimo de 200 millóns de euros para reforzar a capacidade financeira dos municipios.
O Presidente da Deputación dixo que “Estamos pasando un momento económico difícil para os concellos. O incremento do custe dos servizos é importante e creo que todos temos que facer un esforzo neste ámbito”.
Valentín González afirmou que isto é visible en que os concellos destinan cada vez unha maior parte dos fondos do POS+ a gasto corrente: “os alcaldes e alcaldesas, que teñen a aspiración de dedicar o 100% dos fondos do POS a investimentos tanxibles como beirarrúas, unha humanización, unha escola infantil ou unha biblioteca teñen cada vez menos marxe para facer iso e teñen que dedicar máis a gasto corrente. Esa é a fotografía na maioría dos concellos da provincia”, afirmou.
Tamén destacou que o impacto do Plan Único na comarca é xa moi significativo. Desde a súa posta en marcha, mobilizou máis de 252,2 millóns de euros e permitiu executar 1.294 obras nos municipios da comarca de Santiago, converténdose nunha ferramenta clave para o desenvolvemento local e a mellora dos servizos públicos municipais.
Ordes e o Plan Único
Pola súa banda, a deputada de Plans, Cristina García, destacou que o POS+ ten unha gran importancia para concellos de diferentes tamaños e permite atender necesidades moi diversas.
“A creación do Plan Único foi un cambio de paradigma e da forma de entender a colaboración municipal. É un plan que aposta pola autonomía municipal e que sabe adaptarse ás necesidades concretas de cada concello”, apuntou.
“Ademais das obras, o Plan Único permite financiar gasto corrente nun momento no que os concellos estamos ao límite e sobre todo os máis pequenos. Porque é un plan moi importante para todos os concellos pero seguramente concellos como Frades ou Dodro sexa unha ferramenta proporcionalmente máis importante, que marque máis a diferencia”, sinalou Cristina García.
“Cremos que é a mellor forma de colaborar cos concellos e nesa liña imos a seguir traballando desde o goberno provincial”, afirmou a deputada de Plans
O alcalde de Ordes, José Luis Martínez Sanjurjo, agradeceu a visita institucional e destacou a importancia do Plan Único para o desenvolvemento do municipio, subliñando que estas achegas permiten acometer actuacións fundamentais para mellorar os servizos e infraestruturas locais, “nun concello como o noso, cabeceira de comarca”.
No caso concreto de Ordes, o municipio recibirá 1.483.889,46 euros no POS+2026. Desde a creación do plan en 2017, o investimento acumulado da Deputación neste concello ascende xa a 15.418.176,34 euros, que permitiron financiar 54 obras no municipio, que contribuíron nos últimos anos á modernización das infraestruturas e á mellora da calidade de vida da veciñanza.
