Ordes, 26 de febreiro do 2020 – A Deputación da Coruña investirá 230.704 euros na mellora de diversos camiños e estradas municipais no termo municipal de Ordes.
As obras, que veñen de saír a licitación pública na Plataforma de Contratación do Estado, serán financiadas integramente con cargo aos fondos do Plan Único (POS+2019) da Deputación. As empresas interesadas poden presentar as súas ofertas até o vindeiro 17de marzo.
Os traballos permitirán renovar o firme da estrada de Fosado a Parada, en Montados, cunha lonxitude total de 1,4 quilómetros, reparando os desperfectos actuais, dotándoa dunha capa de mestura bituminosa en quente e ampliando o ancho en medio metro a cada lado do vial nun tramo de 1 quilómetro.
Tamén se executarán melloras no camiño do Barroso a Fosado (Montaos), camiño do Castro e acceso á Pedreira desde o cruce da Igrexa (Vilamaior), acceso ao Valiño (Parada) e camiño do Casal (Ordes), que suman unha lonxitude total cercana aos tres quilómetros.