Bisbarra, 23 de decembro do 2024 – Xa queda pouco para que a Vía Verde entre Santiago de Compostela e Cerceda estea rematada por completo en canto se rematen as últimas obras.

Ao mesmo tempo a Deputación preocúpase xa polo mantemento do trazado operativo. O organismo provincial ven de aprobar dous investimentos con estas finalidades. Por un lado 289.000 euros para o tramo da Vía Verde en Santiago; por outro 128.000 euros para o mantemento dos xa existentes.

A sección da Vía Verde que se construirá será o 2.1 cunha lonxitude de 3,1 quilómetros. Este tramo discorre por completo polo concello de Santiago desde o punto quilométrico 7+010, no acceso á aldea de Ramelle, ao 10+180, na ponte sobre o río Tambre.
Neste tramo contémplanse as obras necesarias para o uso do trazado por cicloturistas e camiñantes, con actuacións sobre o firme e a drenaxe, ou a construción de muros, varandas e outros elementos de seguridade.
Este proxecto é a primeira das dúas subfases necesarias para completar o tramo II da Vía Verde, a parte que resta para completar dita infraestrutura, e que ten unha extensión total de oito quilómetros.
As obras no tramo I, que vai dende a estación da Sionlla ata o punto quilométrico 2+200, arrincaron o pasado mes de setembro, iniciando a conexión de Santiago coa maior Vía Verde de Galicia.
En total, o conxunto das actuacións nos tramos I e II suporán un investimento de máis de 1,8 millóns de euros e permitirán sumar 10 quilómetros máis aos 26 que xa compoñen a Vía Verde, a maior de Galicia, atravesando os concellos de Oroso, Ordes, Tordoia e Cerceda.
O mantemento da Vía Verde
A sesión plenaria da Deputación aprobou tamén un novo convenio coa Asociación de Concellos da Vía Verde Compostela-Tambre-Lengüelle, destinado ao acondicionamento e mantemento de diferentes treitos xa existentes desta infraestrutura. A Deputación financiará ditas actuacións con 128.000 euros, que se corresponden a preto do 86% do importe total orzamentado, que ascende a 149.108,84 euros.
As actuacións de mellora recollidas neste acordo inclúen a recuperación de camiños de servizo e trazados alternativos á Vía Verde, a mellora do alumeado do túnel situado no concello de Oroso, a consolidación de noiros para evitar desprendementos, a recollida de augas pluviais con orixe en pasos elevados e obras de drenaxe.