A concelleira de cultura, deportes e lingua de Melide, Ana Mosteiro, e as deputadas de cultura e Plans da Deputación da Coruña, Cristina García e Natividade González, visitaron distintas infraestruturas do municipio
A Deputación é unha ferramenta fundamental en moitas das áreas que teñen que atender os concellos medianos e pequenos da comarca. Máis alá do Plan Único de Obras, as aportacións en materia cultural e deportiva son cada vez maiores.
Coa finalidade de coñecer de primeira man o estado de distintas instalación en Melide, as deputadas provinciais Cristina García e Natividade González, acompañadas da concelleira de cultura, deportes e lingua, Ana Mosteiro, visitaron o concello.
As Deputadas comprometéronse a trasladar e analizar no seo do goberno da Deputación as demandas trasladadas pola concelleira e as posibles solucións que se poderían aportar. Cristina García, Natividade González e Ana Mosteiro, percorreron instalacións como o Pavillón Polideportivo, a Piscina Climatizada Municipal e a Casa da Cultura de Melide.
Durante a visita, puideron comprobar directamente as deficiencias dalgunhas destas infraestruturas, especialmente a piscina municipal. Trátase dun proxecto de grande envergadura, que require un investimento considerable.
A recuperación e mellora destas dotacións resulta fundamental para o Concello de Melide, tanto desde o punto de vista deportivo como cultural, e permitirá garantir servizos públicos de calidade para toda a veciñanza.
Supón, ademais, unha oportunidade para dinamizar a vida social e comunitaria, favorecer hábitos de vida saudables e mellorar o acceso á cultura e ao deporte, especialmente entre a mocidade e as persoas maiores.
A concelleira, Ana Mosteiro, agradeceu a dispoñibilidade de colaboración e trasladou “a importancia da cooperación institucional para avanzar cara solucións reais”.
Ana Mosteiro quixo tamén valorar a visita e tamén o traballo que se fai desde o goberno da Deputación facendo fincapé “ en que apoiar desde esta institución aos concellos en actuacións deste tipo son unha aposta polo reequilibrio territorial e pola mellora das condicións de vida no rural”.
