Brión, 25/02/26 – O coworking Darredor, no concello de Brión, forma parte da rede de centros da Deputación, sendo un dos máis apegados ao territorio, Os produtos de proximidade e a súa elaboración son o núcleo do seu traballo.
Co fin de ampliar esas posibilidades a Deputación ven de financiar a compra do equipamento necesario para ampliar as liñas de produción de conservas vexetais e masas. O proxecto subvencionado leva por nome “Valorización de recursos locais para a elaboración de conservas artesanais”.
Esta semana o coworking de Brión recibiu a visita da deputada de Mar e Medio Rural, Cristina Capelán, e a concelleira de Emprego de Brión e presidenta do GDR Terras de Compostela, Guarina Rey.
O motivo do encontro coñecer in situ as instalacións que xestiona a asociación Darredor. O investimento aportado pola Deputación, que ascende a 13.500 euros, permitirá mellorar os obradores da entidade e aumentar a súa capacidade de produción.
Na visita a Brión Cristina Capelán, e Guarina Rey, estiveron guiadas pola presidenta da Asociación Darredor, Nieves Dosil, e pola dinamizadora do coworking brionés, Carme Freire.
Capelán destacou que Darredor desempeña un papel clave na transformación e comercialización de produtos agrarios e forestais da contorna e sinalou que o apoio a iniciativas como esta xera valor engadido ás producións locais, evita perdas e abre novas oportunidades económicas para produtoras e produtores do rural.
A subvención permitiu a Darredor adquirir nova maquinaria e equipamento para os dous obradores da entidade, o de conservas vexetais e o de masas. Estas melloras optimizarán a transformación de alimentos, reforzarán as garantías sanitarias e incrementarán a capacidade produtiva do centro de Brión.
Cos produtos do agro local elaboran marmeladas, cremas de verduras, zumes de froitas, froitas deshidratadas e outras preparacións que permiten aproveitar mellor as colleitas mediante a súa transformación, xerando maior valor engadido e reducindo perdas no campo. Uns produtos que, grazas a espazos colaborativos como o coworking de Brión, poden chegar ao mercado con todas as garantías sanitarias e con produtos elaborados como zumes, marmeladas, salsas, patés, cremas…que se producen e transforman dun xeito totalmente sostible”.
Pola súa banda, Guarina Rey puxo en valor que “dende o Concello de Brión e o GDR Terras de Compostela queremos apoiar o noso rural e promover o comercio dos mellores produtos que producen os noso veciños e veciñas nas súas hortas.
Darredor: un referente do rural coruñés
A Asociación conta actualmente con 85 persoas asociadas e máis de 200 persoas vinculadas á súa actividade, ademais de colaborar con outras asociacións e comunidades de montes da provincia.
Só en 2023, os seus obradores rexistraron 482 xornadas de uso, consolidando a entidade como un referente na transformación artesanal de produtos do sector primario.
Investimentos como este contribúen a fortalecer o emprendemento rural e a avanzar cara a un modelo sostible baseado nos recursos locais, promovendo economía, emprego e innovación no rural da provincia.
