A renovación na que colabora a Deputación supón un investimento de máis de 180.000 euros e beneficiará aos tres equipos que usan na actualidade as instalacións.
A Deputación da Coruña e o Concello de Santiso veñen de formalizar un convenio de cooperación para o cofinanciamento das obras de reposición do céspede artificial no campo de fútbol municipal de Santiso.
O acordo permitirá acometer unha actuación moi demandada pola veciñanza e polos clubs locais, que suporá a renovación integral do terreo de xogo despois de máis de vinte anos de uso continuado.
A Deputación achegará un total de 123.000 euros, o que representa o 66,25% do orzamento total da obra, cifrado en 185.648,62 euros, mentres que o Concello completará o financiamento con fondos propios. Na firma do documento participaron o presidente da Deputación, Valentín González Formoso, e o alcalde de Santiso, Manuel Adán.
As obras contemplan a retirada do equipamento deportivo e do céspede artificial existente, o acondicionamento e reparación do firme e da canaleta perimetral, e a instalación dun novo céspede de última xeración, con base elástica e materiais homologados segundo o programa FIFA Quality.
En total a Deputación axudará a renovar máis de 5.200 metros cadrados de superficie de xogo, co obxectivo de mellorar as condicións de seguridade e confort para deportistas e usuarias das instalacións.
O campo de fútbol de Santiso, construído hai dúas décadas, acolle actualmente a actividade de tres equipos (un sénior, un de veteranos e un feminino) que adestran e compiten a diario nestas instalacións. A actuación considérase, por tanto, de especial relevancia social e deportiva para o municipio, contribuíndo á promoción do deporte base e á mellora da calidade dos servizos públicos locais.
Con este convenio, a Deputación afonda no seu compromiso coa cooperación cos concellos da provincia, especialmente cos de menor capacidade económica, impulsando investimentos que melloran a vida da cidadanía e fomentan a práctica deportiva en condicións óptimas.
