Bisbarra, 6 de marzo do 2025 – A Deputación da Coruña conmemora neste 2025 o 8M “Día da Muller” desenvolvendo unha xornada sobre os “Retos e Resistencias das Mulleres Migrantes”.
A cita terá lugar mañá 7 de marzo no Circo de Artesáns (rúa Santo Andrés 36) de 9.15 a 14.00h. O obxectivo desta xornada é reivindicar as múltiples barreiras que enfrontan no seu proceso de integración social, laboral e cultural e no exercicio pleno dos seus dereitos.
Para participar é preciso inscribirse neste formulario ou escaneando o QR do cartaz.
A Deputada de igualdade Soledad Agra explica que “As mulleres migrantes atravesan múltiples discriminacións non só polo feito de ser mulleres, senón tamén por ser migrantes. Súmanse dous factores que reforzan unha brecha que aínda hoxe continúa a ser infranqueable”.
Agra engade que “A precariedade laboral, as dificultades para acceder a unha vivenda digna e a tripla discriminación por xénero, orixe e situación administrativa irregular agravan a súa situación de vulnerabilidade, sendo vítimas de discriminación transversal, que combina factores de xénero, orixe e situación socioeconómica”.
O obxectivo da área de igualdade neste 8M é promover un espazo de reflexión e diálogo sobre as experiencias, desafíos e estratexias de resistencia das mulleres migrantes na sociedade actual.
Un punto de encontro para activistas, expertas, representantes da comunidade migrante e público en xeral para compartir testemuños e propostas sobre as políticas e prácticas necesarias para garantir a súa inclusión e benestar.
Yarama Africa, entidade sen ánimo de lucro que deseña e desenvolve proxectos sociais e culturais cun importante transfundo social sobre feminismo, antirracismo e compromiso social é a facilitadora deste encontro, que finalizará co monólogo antiracista e afrofeminista de Asaari Bibang.
Toda a información do encontro “Retos e resistencias das mulleres migrantes”
