Bisbarra, 17 de abril do 2023 – A Deputación da Coruña apura o tempo que antes das eleccións e ven de aprobar no último pleno convenios cos concellos de Santiago e Trazo.
A controvertida Casa da Xuventude de Compostela, a Vía Verde que unirá a capital con Cerceda y arranxos para a mellora da seguridade vial en Trazo foron os principais temas aprobados na sesión plenaria da Deputación.
O convenio sobre a Casa da Xuventude de Santiago foi aprobado con 16 votos favorables de PSOE, BNG e Alternativa dos Vecinos, a abstención de Marea Atlántica e o voto en contra do Partido Popular. O acordo inclúe a cesión do inmoble á Deputación da Coruña e a completa adaptación do mesmo para o seu uso como oficina da Deputación en Santiago, espazo de coworking provincial e área de usos municipais.
É un resultado esperado pero que conleva un dato contraditorio. Hai uns días o BNG de Compostela presentaba un proxecto que inclúe o derrubo da Casa da Xuventude, sen embargo o grupo nacionalista votou a favor dun convenio que implica a rehabilitación do edificio. Enténdese que os acordos de goberno na Deputación obrigan ao BNG polo que todo dependerá do que suceda nas eleccións.
Vía Verde
Outro convenio aprobado e xa anunciado é o que permitirá a construción do primeiro tramo da Vía Verde. Partirá desde a vella estación da Sionlla e será o máis custoso, polos túneles, dos dous previstos para enlazar cos tramos xa rematados.
A Deputación aportará 527.969,23 euros do total de 826.756,70 euros que supoñen o orzamento da obra.
Queda pendente unha segunda fase que rematará a conexión coa Vía Verde xa está en funcionamento, en Sigüeiro. O investimento será en este caso de 800.000, dos que 300.000 euros serán aportados pola PSTD Vía Verde, 250.000 euros pola Deputación da Coruña e 250.000 euros polo Concello de Santiago.
Camiños en Trazo
Non menos importante é o outro convenio aprobado no pleno da Deputación e que permitirá a mellora de camiños unen que unen os núcleos de Baixa e a Alta do Concello de Trazo.
O investimento total é de 121.810 euros, o 61% (75.224 euros) financiados polo organismo provincial. O obxectivo é mellorar a capa de rodaxe desta estrada, de máis de 1.160 metros de lonxitude e un ancho medio de catro metros.
As obras consisten na extensión dunha capa de macadam de quince centímetros, para posteriormente aplicar tres regas en toda a superficie. Tamén procederase á limpeza de cunetas por toda esta rede viaria. O prazo previsto para acometer esta actuación é de dous meses a partir da aprobación do acto de replanteo.
