torrecilla@torrecilla.net
Tras anularse o convenio firmado, nos últimos días do anterior mandato, co goberno municipal de Compostela; a Deputación busca un espazo no que encaixar o proxecto presentado hai tres anos.
A Deputación da Coruña licita por 1.125.300 euros a adquisición dun inmoble que acollerá unha oficina tributaria, coworking, auditorio e aula de formación. O presidente, Valentín González. destaca que a nova sede permitirá “achegar a Deputación á cidadanía, ofrecer servizos útiles e crear espazos abertos á actividade económica, social e cultural”.
O edificio terá un prezo máximo de 1.200 euros por metro cadrado construído. Deberá situarse na trama urbana do centro da cidade, con boa conexión ao transporte público e proximidade á estación intermodal, facilitando o acceso tanto das persoas usuarias como do persoal.
A superficie útil mínima esixida é de 670 metros cadrados, cun mínimo de 770 metros cadrados construídos, e priorízanse espazos en planta baixa ou que permitan un itinerario completamente accesible sen barreiras arquitectónicas.
O prazo de presentación de ofertas está aberto ata o 27 de febreiro.
Servizos á cidadanía
A futura sede da Deputación da Coruña en Compostela albergará unha oficina de recadación tributaria duns 200 metros cadrados, con zona de espera pública e unha área de traballo aberta con capacidade para un mínimo de 17 postos, ademais dun despacho independente para a xefatura de zona.
Contará tamén cun espazo destinado a coworking de arredor de 100 metros cadrados, sala de reunións, un auditorio para acoller actividades culturais e reunións, aula de formación con capacidade mínima para 75 persoas e un local institucional destinado a actividade representativa, encontros e presentacións. Disporá ademais de área de arquivo e almacén e aseos accesibles.
O futuro edificio da Deputación deberá cumprir a normativa vixente en materia de accesibilidade, seguridade e saúde laboral, así como garantir ventilación e iluminación natural e conexión ás redes básicas de subministración.
O presidente da Deputación, Valentín González Formoso, xa avanzara esta iniciativa durante a presentación dos Orzamentos provinciais de 2026, nos que anunciou a apertura das dúas primeiras sedes provinciais fóra da capital: unha en Ferrol e outra en Santiago.
Formoso destacou que esta aposta responde a unha estratexia do goberno provincial de descentralización e proximidade, co obxectivo de facilitar unha relación máis directa entre a administración provincial e a cidadanía. “Queremos achegar a Deputación á cidadanía, ofrecer servizos útiles e crear espazos abertos á actividade económica, social e cultural”, sinalou.
A licitación da compra do inmoble de Santiago enmárcase nun proceso máis amplo que inclúe tamén a futura sede en Ferrol, onde a Deputación está a valorar actualmente as cinco ofertas presentadas á licitación pública para a adquisición dun inmoble de características semellantes. Con estas actuacións, a institución provincial reforza a súa implantación territorial e dá un paso máis na modernización dos seus servizos, apostando por espazos accesibles, versátiles e ao servizo da cidadanía.
