Bisbarra, 5 de setembro do 2023 – A Deputación provincial da Coruña ven de aprobar axudas a 23 entidades que desenvolven actividades de conservación do medio ambiente.
O montante total de este investimento en medio ambiente chega a un total de 218.872 euros. Un importe que servirá para financiar actividades de conservación de hábitats de alto valor natural e de sensibilización e educación ambiental
O Boletín Oficial da Provincia (BOP) publicou a resolución definitiva destas subvencións, que van dos 2.000 aos 20.000 euros por entidade. A través destas achegas fináncianse proxectos de todo tipo e que en algúns casos teñen unha longa traxectoria coma o programa de custodia do territorio da Fundación Fragas do Mandeo ou a actividade “Defende o mar a través do surfing” de Surf and Clean, dirixida aos escolares da provincia e que contempla actividades tanto nas aulas dos colexios como nas praias.
Na bisbarra de Compostela unha das asociacións apoiadas é Amabul, en Vedra, que cumprirá no 2024 vinte anos. Amabul dedícase a promover pequenos proxectos no ámbito municipal para a valorización da natureza endóxena, como o Vedra Terrae, para promover competencias científicas entre as súas xentes, a través da Semana da Ciencia ou para re conectar co pasado dos seus poboadores, como no proxecto Roteiro da Emigración.
Tamén se financian accións de limpeza de espazos naturais, actividades de sensibilización ambiental ou de conservación de especies de fauna e flora autóctona.
A deputada responsable da área de Medio Ambiente, Rosa Ana García López, subliñou que “estas axudas contribúen a preservar a riqueza medioambiental da provincia e á sensibilización da sociedade, e particularmente dos escolares, sobre a importancia de coidar o planeta e promover a sustentabilidade en todos os ámbitos”.
