Ordes, 6/05/2026 – O portavoz do BNG de Ordes, Pablo Vidal, reclama que se supervisen as obras de demolición das antigas instalacións da empresa Viriato. Os nacionalistas presentaron un escrito por rexistro don recollen as queixas veciñais e piden a intervención do concello.
Para o BNG, os traballos de machucado do escombro “están a xerar unha gran cantidade de po en suspensión, que acaba entrando polas fiestras nas vivendas próximas á obra, ou mesmo impide o uso de espazos exteriores, como terrazas”.
O bloque de Ordes demanda ao alcalde, José Luís Martínez Sanjurjo, que “requirira á empresa adxudicataria dos traballos, o emprego das medidas establecidas no prego do contrato, como canóns nebulizadores de auga, de xeito que se reduza a xeración de po durante os traballos de machuqueo dos materiais”.
Por outra banda, a fronte nacionalista sinala que o recinto da gardería Herminio Rial “atópase completamente aberto e exposto, sen dispor ningún tipo de valado cara a parcela onde se efectúan os traballos de demolición”, algo que para o portavoz do BNG, Pablo Vidal, supón “unha imprudencia e irresponsabilidade totalmente inaceptable, que debe ser corrixida inmediatamente”.
Os nacionalistas de Ordes demandan “levar a cabo as actuacións precisas para eliminar os riscos derivados da execución da obra sobre o recinto da gardería, como o po en suspensión, caídas a distinta altura sen ningún tipo de protección, proxección de materiais ou partículas…”.
Segundo opina Pablo Vidal, neste tipo de situacións “non existe unicamente unha responsabilidade técnica, se non que tamén existe unha responsabilidade política derivada dun goberno totalmente apoltronado, que cobra salarios por unhas obrigas que logo non asume”.
