Non é a primeira vez que se denuncia o mal estado da biblioteca do Milladoiro, en Ames. O seu deterioro co paso dos anos fíxose cada vez máis evidente e as últimas imaxes o poñen en evidencia.
UCIN Galicia denuncia a gravidade da situación di biblioteca. Filtracións deficiencias estruturais e en xeral problemas debidos a “un evidente deterioro por falta de mantemento”.
Dende UCIN sinalan que as imaxes coñecidas nos últimos días, con cubos recollendo auga no interior das instalacións e placas do falso teito retiradas, “non son propias dun edificio público en funcionamento, senón dunha infraestrutura abandonada á súa sorte”.
Engaden que “é absolutamente intolerable que un espazo destinado ao estudo, á lectura e á formación da nosa mocidade teña que operar en condicións que comprometen tanto a conservación do material bibliográfico como a seguridade das persoas usuarias”.
Tamén advirten que as filtracións continuadas poden provocar o deterioro irreversible de libros e fondos documentais; posibles incidencias nas instalacións eléctricas ou problemas de salubridade derivados da humidade persistente.
A formación política reclama ao Goberno municipal do Concello de Ames que informe con claridade sobre as actuacións previstas e o seu calendario de execución. UCIN Galicia considera que “a veciñanza do Milladoiro merece instalacións públicas dignas e en condicións óptimas, especialmente nun servizo básico como é unha biblioteca municipal”.
