Val do Dubra, 22 de febreiro do 2022 – Os socialistas de val do Dubra critican a falta de axudas á natalidade e que se rexeitara a moción presentada en este sentido no último pleno municipal.
O voceiro do Psoe en Val do Dubra, Diego Luís Díaz, explica que se trataba dunha moción que só quería impulsar “unha ordenanza reguladora de axudas para nacementos de fillos e fillas, adopción ou acollemento preadoptivo, tal e como xa teñen concellos similares ao noso, e que estas se poidan outorgar en base a criterios obxectivos, entre os que figure a renda”.
Díaz engade que esta ordenanza “tería un impacto económico menor no orzamento e ademais ía en consonancia coas normativas aprobadas en concellos gobernados polo PP, como O Pino, Frades ou Tordoia; sen embargo o goberno dubrés, composto polo PP, Terra Galega e un concelleiro independente, decidiron rexeitar esta proposta”.
Os socialistas lembran que Val do Dubra ten nos últimos anos unha tendencia clara de perda de poboación. O envellecemento e o desprazamento a núcleos máis urbanos son algunhas das causas de esta disminución da veciñanza.
Diego Díaz destaca que “O número de habitantes no ano 1996 superaba os 5.000 habitantes, descendendo neste último ano 2021 ata os 3.800 aproximadamente”.
