A Estrada, 22 de febreiro do 2022 – O BNG da Estrada demanda do goberno municipal máis investimentos nas parroquias do rural.
Os nacionalistas lanzan a campaña “Núcleos de Centralidade Parroquial”. O obxectivo é poñer en valor espazos do rural que xa son usados polos veciños pero precisan investimentos.
Actuacións tamén no rural
A voceira do BNG no concello, Susana Camba, critica o reparto das axudas que chegan “Non pode ser que o alcalde concentre todas as actuacións na vila, deixando o resto do noso concello, á marxe dos investimentos, veñan estes da Xunta, da Deputación ou dos fondos europeos como a EDUSI”.
Camba engade que “O rural é algo máis que asfaltados. No rural estradense hai puntos onde se concentra a actividade social das parroquias e a nosa proposta é que o goberno municipal os poña en valor, rehabilitándoos e dotándoos de servizos para uso e desfrute de veciños, veciñas e asociacións que traballan nas parroquias”.
Núcleos de Centralidade
Os nacionalistas denominan a estes espazos “Núcleos de Centralidade Parroquial”. Susana Camba explica que se trata de “espazos que xa existen, sobre os que traballa diario a veciñanza, pero que necesitan ao noso entender unha mellora e un coidado por parte do goberno municipal”.
“A carballeira da Sagrada na parroquia de Codeseda é un deses puntos”, indica a concelleira nacionalista, “seguramente o máis singular, xa que no seu día acolleu unha importante feira e hoxe como entón é o núcleo sobre o que pivota toda a actividade social de Codeseda e de todas as parroquias do arredor”.
“Por outra parte”, engade a concelleira, “a carballeira da Sagrada é un espazo singular polo valor patrimonial (o cruceiro e a igrexa) e natural (a carballeira centenaria) que encerra, que temos que protexer e coidar, pero sen descoidar os servizos que necesitan os veciños e veciñas”.
“Neste caso en concreto da Sagrada”, engade a concelleira nacionalista, “é urxente a rehabilitación e limpeza do cruceiro, a poda das árbores centenarias, arranxo do palco, a posibilidade de reutilización dalgunha das casas da contorna como espazo social, limpeza da carballeira e outras melloras”.
“Son actuacións que non necesitan un gran investimento, mais a mellora e o cambio serían notorios; pero claro, hai que ter vontade política”, explica Susana Camba.
