Teo, 11/04/2026 – Teo enrédase unha vez máis nunha polémica sobre a instalación dunha planta de reciclaxe de residuos. En este caso residuos inertes de obra, nunha empresa que xa se dedica a temas similares e, ao parecer, con todo ao seu favor.
As últimas novas confrontan as declaracións da Conselleira de medio Ambiente e Cambio Climático, Ánxeles Vázquez, coa Plataforma Veciñal. Vázquez lembrou que toda instalación de este tipo require dunha declaración de impacto ambiental pero tamén que “ao igual que se xeran residuos, teñen que existir sitios onde reciclalos”.
A Conselleira tamén dixo ante os medios de comunicación que “o que non pode ser é que se cre unha Plataforma cada vez que se quere instalar algo”. A Plataforma pola súa banda insiste no prexuízo para as vivendas polo po en suspensión e o paso de transportes pesados.
As respostas nun pleno
A empresa leva máis de trinta anos, no mesmo sitio, dedicándose a obras privadas e obra civil. A actividade de reciclaxe de residuos de obra, a que agora quere facer, forma en certo modo parte do que fai e, en certo modo, xa o ten feito.
A petición de permisos para que esa actividade de reciclaxe estivera regulada motivou a mobilización veciñal. O pleno extraordinario convocado o pasado mércores foi, polo momento, o último capitulo de esta historia e a posibilidade de atopar respostas claras.
Posicións ao respecto da planta
Os representantes veciñais que falaron antes do pleno destacan os riscos da actividade na proximidade das casas. Po no ambiente, que pode conter partículas de, por exemplo, amianto; ruído ou transito de vehículos pesados por estradas non preparadas foron algúns dos argumentos alí esgrimidos.
Despois chegou a queda dos políticos que camiñaron na ambigüidade xa que apoiaban aos veciños pero eran conscientes que o proxecto polo momento segue os pasos precisos.
Proxecto común de Teo centrouse en que o pleno tiña que terse celebrado antes “e explicar o que ía suceder”. O BNG asegurou que o goberno municipal “non protexeu á veciñanza ao non emitir o informe reclamado pola Xunta” e puxo o acento na debilidade das estradas e o custo que suporá o seu arranxo ademais da inseguridade viaria que producirá.
O Psoe aludiu ás distintas posturas do equipo de goberno segundo estivera na oposición ou gobernando. Pedíronlle ao executivo que fixera o que pedían no caso da canteira da Casalonga “un informe de incompatibilidade”.
Postura do goberno
A alcaldesa, Lucía Calvo do PP, foi contestando aos voceiros dos grupos e explicou a postura do equipo de goberno e o feito ata o momento. Calvo dixo que falara co propietario da empresa e ofreceralle mudarse ao futuro polígono industrial pero despois de máis de trinta anos nunha ubicación nin quere nin ten a necesidade de mudarse.
A debilidade das estradas polas que pasará o transporte e se aguantarán o tránsito “é algo que deben dicir os técnicos” continuou a alcaldesa.
Sobre o informe solicitado pola Xunta de Galicia a normativa indica que no caso de que o informe non sexa remitido o expediente será arquivado. Lucía Calvo indicou que dos últimos dez informes de este tipo solicitados pola Xunta a distintos concellos “sete non foron entregados e os outros tres foron favorables”. Ante a posibilidade de ter que emitir un informe favorable ou a posibilidade de que se arquivara o expediente optaron por esta última opción. De todos xeitos quedou claro que a empresa pode reclamar que o informe se emita e terá que ser favorable xa que cumpre coa norma.
O responsable de urbanismo
Tamén interveu o responsable de urbanismo que confirmou todo o dito pola alcaldesa e avanzou un pouco máis na situación legal da petición. O técnico dixo que o que se solicitou desde a Xunta foi un “informe de viabilidade urbanística e coa lei na man só o podemos facer favorable. Non hai deixación de funcións. Isto é así porque se trata dun so rústico”.
A lei o que indica é que o tratamento de residuos de este tipo en so rústico pode darse sempre que “non impliquen a urbanización ou transformación urbanística dos terreos polos que discorre”. O realizado ata o momento. Dentro dos terreos da empresa, non supón unha transformación ou urbanización do lugar.
O resumo sería que emitir un informe desfavorable sería cometer unha ilegalidade. Sobre a posibilidade de que as estradas non estean preparadas hai unha variable coa que ninguén contaba. Si o peso máximo para este tipo de vías é de 3500 quilos nin o camión do lixo podería pasar o que supón un problema que todo o mundo no pleno decidiu obviar.
Un pleno que podedes ver completo en Youtube e que deixa todo en empate. Vivir no rural ten vantaxes pero tamén pode ter inconvenientes como este. Teremos que esperar para saber que sucede.
