Santa Comba, 02/06/2026 – O Concello de Santa Comba presenta a programación “De sol a sol”, unha completa oferta de actividades culturais, deportivas, educativas e de lecer que se desenvolverá entre os meses de xuño e setembro.
O obxectivo é dinamizar a vida social do municipio e ofrecer alternativas de ocio para toda a veciñanza durante a época estival. A iniciativa inclúe máis dunha vintena de propostas pensadas para públicos de todas as idades, combinando espectáculos, cine ao aire libre, deporte, formación, actividades familiares, campamentos e iniciativas de promoción da cultura e da literatura.
A programación de Santa Comba comeza xa nos primeiros días deste mes de xuño coas actividades de Aprende a través do surfing, desenvolvidas no CEIP Pepe de Xan Baña e na praia de Razo. Durante este mes celebraranse tamén citas destacadas como o espectáculo musical e audiovisual Zahira, o sábado día 6; a V Foliada do Agro da Ponte (sábado 13); o festival de fin de curso das ensinanzas musicais municipais (venres 19); a final da Copa da Costa feminina (domingo 7) ou o encontro entre os veteranos do Xallas-Costa da Morte e as Lendas do Real Madrid, que incluirá unha homenaxe a Doro (sábado 27).
O mes de xullo combinará deporte e lecer familiar con propostas como o ciclo Cine baixo as estrelas, que o venres 3 proxectará Buffalo kids na praza da Casa da Cultura; a velada de boxeo (sábado 4); os torneos de fútbol 7 de Castriz (4 e 5) e Santa Sabiña (11 e 12); o III Torneo de Tenis de Mesa (xoves 23); a festa con inchables na piscina municipal (xoves 30) e o programa Explora Santa Comba, destinado á mocidade, que se desenvolverá na segunda quincena do mes.
Un mes de agosto mirando ao ceo
En agosto, a programación continuará co Campamento Tecnolóxico, que se desenvolverá durante todo o mes, así como coa ruta de observación das perseidas e do esperado eclipse en San Bartolomeu. Ademais, haberá unha nova sesión de cine ao aire libre o sábado 21 coa proxección de Rondallas, o VI Torneo de Pádel (sábado 22) e o espectáculo familiar Onde viven os monstros, que servirá como clausura dos campamentos de verán o venres 28.
A programación pecharase en setembro cun marcado protagonismo da cultura e da creación literaria. Así, celebraranse as xornadas-taller para escritores impartidas por Lucía Aldao, o I Recital Poético e Micro Aberto (sábado 5), o Torneo de Tenis dos Milagros (domingo 13) e a gala de entrega de premios do I Certame Literario Reversos (sábado 26), unha das principais novidades desta edición.
“Esta programación busca converter o verán nun espazo de encontro, participación e convivencia, ofrecendo actividades gratuítas e accesibles que poñen en valor tanto o talento local como a colaboración co tecido asociativo, deportivo e cultural do municipio”, subliña Patricia Val, concelleira de Cultura de Santa Comba. Baixo o lema Santa Comba De sol a sol, “apostamos por un verán cheo de propostas para desfrutar en comunidade, reforzando a oferta cultural e de lecer durante os meses de maior actividade social”.
