Compostela, 4 de outubro do 2018 – Curtocircuíto inaugura hoxe xoves unha das novidades de esta edición, as Mesas Interxeracionais do Audiovisual Galego.
As Mesas Interxeracionais son un conxunto de relatorios e debates construtivos para destruír tópicos, mitos e prexuízos do sector. O festival buscará atopar puntos en común entre os diferentes profesionais, e os seus xeitos de traballar e de facer, nunha primeira sesión que terá lugar no CGAC ás 10.00h e na que intervirán profesionais como Brais Romero, Felipe Lage, Jorge Coira, Antón Reixa, Lucía C. Pan, Sonia Méndez, David Melero e Antonio Durán “Morris”.
Tamén no CGAC terá lugar a proxección de Supernova, sección que nace nesta 15ª edición do festival para salvar a brecha existente entre os centros de formación e os circuítos profesionais. Esta sesión será ás 19.00h e contará coa presenza de Lucía Estévez, Marta Valverde, Ariadna Corral, Alejandro Rodríguez, Daniel Arana, Sara Iglesias, Alicia Alonso, Artur M. Puga e Lara e Noa Castro.
Ás 18.30h no Teatro Principal proxectarase a terceira sesión da sección competitiva Radar na que contaremos coa presenza do cineasta Willy Hans (Das Satanische Dickicht – Drei). Por outra banda, ás 20.00h en Numax, dará comezo a sección Púlsar, na que se porá o foco sobre o traballo da cineasta Jessica Sarah Rinland. Seguindo cos focos e restrospectivas, ás 22.30h no Teatro Principal haberá unha proxección do traballo de Bertrand Mandico e Elina Löwensohn coa presenza de ambos.
Xa para rematar a xornada, ás 22.30h haberá un concerto na sala Capitol no que actuarán Nighcrawler, 16 Pineapples e Narcoleptica. O synthwave e o darksynth son as bases fundamentais do universo sonoro de Nightcrawler, inspirado nos sons das bandas sonoras de terror dos anos 80 e as películas de ciencia ficción, combinando estes ingredientes con ritmos electrónicos e atmosferas escuras. No caso de 16pineapples o grupo redefine os conceptos e os límites da música en vivo incorporando tecnoloxías que fan interactivo e polo tanto reproducible calquera obxecto. Narcoleptica, en palabras da artista, é Beatriz Vaca facendo ruído. Experimentación + mezcla de orixes sonoras + live-looping nunha experiencia de estratificación sónica.
Hoxe xoves ademais terán continuidade as sesións adicadas aos máis pequenos e pequenas da casa: Teenage Riot e Criaturas e a segunda sesión do obradoiro de Arredor do son II: caligrafías sonoras impartido pola sonidista Amanda Villavieja.
