Compostela, 6 de outubro do 2021 – A filmografía de Yann Gonzalez, o traballo de Enar de Dios e o concerto de Verde Prato, protagonistas da xornada en Curtocircuíto
Hoxe dá comezo o primeiro pase do Foco dedicado á filmografía do cineasta Yann Gonzalez, que estará o sábado 9 na cidade. No pase de hoxe, que dará comezo ás 18:00 horas no Teatro Principal, proxectaranse dous dos dez traballos que seleccionou o festival: Les rencontres d’après minuit e Les astres noirs.
Por outra banda ás 20:15 horas tamén comeza a sección competitiva Penínsulas, que exhibirá os últimos traballos de cineastas como Gerard Ortín con Future Foods; Marina Lameiro e Maddi Barber con Paraíso; ou Irati Gorostidi con Unicornio. Durante o festival, proxectaranse un total de 14 títulos que poñen especial atención no cinema de autor máis persoal do panorama estatal a través de xéneros como o documental, a ficción ou outros próximos ao desktop-documentary.
Tamén terá lugar hoxe a primeira proxección da sección Terra, que rinde homenaxe ao traballo da artista ourensana Enar de Dios, que estará presente e manterá un coloquio trala proxección. O seu traballo transita entre o ensaio, o traballo museístico e o expositivo e no primeiro pase, que terá lugar ás 19:34 horas en NUMAX exhibiranse os traballos Liquid Ground e The sea is History.
O festival contará tamén coa presenza dos cineastas franceses Caroline Poggi e Jonathan Vinel, que manterán un encontro co público tralo primeiro pase da sección Púlsar, que esta edición se centra no seu traballo como referentes dunha ola de cineastas que entenden o cinema como unha arma de expresión crúa e sinceira. Mañá proxectaranse seis dos seus traballos: Toys on Fire; Le malentendu; Notre amour est assez puissant; Notre héritage; Martin Pleure; e Chiens.
Curtocircuito organoza ademais outro coloquio, a cargo de David Domingo aka Stanley Sunday, quen se encontrará co público tras a proxección do seu traballo Stop, e Hier, de Wendelien van Oldenborgh.Os dous traballos forman parte da sección Playlist e proxectaranse ás 17:00 horas no Salón Teatro.
Concertos e A/V
O festival inclúe tamén outras linguaxes contemporáneas, ademais do cinematográfico. A programación interdisciplinar contará esta noite co concerto, ás 22:00 horas na Igrexa da Universidade, da proposta en euskera de Verde Prato e os galegos Crnds & Álvaro Chior A/V & Fransy González.
Ademais, continuan as proxeccións da Sección Oficial co terceiro pase de Explora ás 22:15 horas no Teatro Principal. A sección inclúe cinco títulos: Terra Australis Incognita, de Andrea Bordoli; Baki Tadu É, de Kate Saragaço-Gomes e Calum MacBeath Morgan; Corps Samples, de Astrid de la Chapelle; Pseudosphynx, de Ana Vaz; e Imperial Irrigation, de Lukas Marxt, quen participará no coloquio trala proxección.
A programación do día complétase coa segunda sesión dun obradoiro presencial sobre publiidade para proxectos realizados por xoves emerxentes, a cargo de Teresa Morales, e a actividade en liña Representacións da metamorfose ás 18.00, co coreógrafo e bailarín Antonio Ruz, a performer, bailarina e poeta Helena Salgueiro e a fotógrafa e a artista visual Virginia Rota.
