Compostela, 29 de xuño do 2017 – O Consello Superior de Investigacións Científicas (CSIC) nomeou a Concepción Sánchez Fernández, científica titular do CSIC, directora do Instituto de Investigacións Agrobiolóxicas de Galicia.
Carmen Trasar Cepeda, directora desde 2008, será a vicedirectora.
Concepción Sánchez Fernández, natural de Lalín, é a xefa dun dos seis grupos de investigación do IIAG, Biotecnoloxía de especies leñosas, e desde 2008 exercía á súa vez como vicedirectora do centro.
Licenciada e doutora en Bioloxía pola Universidade de Santiago de Compostela, realizou a súa tese doutoral no ámbito da micropropagación de árbores adultas no IIAG. Completou a súa formación cunha estancia postdoctoral na Universidade de Minnesota (Estados Unidos) e con estancias curtas noutros centros europeos de referencia no ámbito das investigacións sobre a biotecnoloxía de especies leñosas.
Desde 1999 forma parte do persoal investigador do CSIC no IIAG, onde puxo en marcha a liña de investigación de bioloxía molecular para a caracterización de xenes relacionados coa perda de capacidade morfoxenética asociada ao envellecemento e coa adquisición da competencia en procesos de derexeneración.
O seu labor científico desenvólvese no ámbito da biotecnoloxía das especies leñosas, particularmente en especies forestais (castiñeiro e carballo), abordando diferentes aspectos a nivel fisiolóxico e molecular relacionados coa micropropagación de árbores adultas, así como a rexeneración e conservación de xermoplasma.
A súa traxectoria científica está avalada por publicacións en revistas científicas de impacto e capítulos de libros. Desenvolveu as súas investigacións tanto a través da dirección de proxectos de investigación financiados por convocatorias públicas competitivas autonómicas, nacionais e internacionais como de contratos con empresas.
Entre os resultados das súas investigacións figura a posta a piques de métodos de rexuvenecemento para a clonación de árbores adultas seleccionadas, a optimización de protocolos de enraizamento e caracterización molecular do material micropropagado, a caracterización de xenes que teñen un papel relevante en etapas temperás da formación de raíces adventicias e de xenes que participan no desenvolvemento embrionario ou a identificación de varios xenes candidatos que parecen estar implicados nos mecanismos de defensa do castiñeiro ante a infección por Phytophthora cinnamomi, causante da enfermidade da tinta na devandita especie.
O IIAG
O IIAG, con sede no Campus Vida da Universidade de Santiago de Compostela, data de 1953. O seu obxectivo é realizar investigación científica e técnica na área agroforestal, sendo, por tanto, o chan e as plantas os suxeitos prioritarios das súas investigacións e a mellora dos sistemas agroforestais o seu obxectivo inmediato.
Organízase ao redor de dous departamentos (Bioquímica do chan e Fisioloxía vexetal) e seis grupos de investigación: Bioquímica e calidade de chans, Ciclo bioxeoquímico do carbono edáfico, Enzimoloxía do chan, Microbioloxía, Biotecnoloxía de especies leñosas e Biotecnoloxía e mellora forestal.
