Compostela, 13 de febreiro do 2025 – A fotógrafa Isabel Muñoz inaugurou, no Ámbito Cultural do Centro Comercial Compostela, unha mostra sobre o primeiro templo da humanidade.
Isabel Muñoz mostrou antes os medios a súa paixón por un proxecto no que leva traballando os últimos cinco anos. Para esta premiada artista a exposición explica “de onde vimos, onde estamos e que imos deixar para as xeracións futuras”.
As imaxes e vídeos que se poden ver na instalación corresponden ao tenmplo Göbekli Tepe, en Turquía. Tal como explicou Isabel Muñoz miles de anos antes de que se puxesen as primeiras pedras en Stonehenge ou nas pirámides de Exipto, os seres humanos empezaron a reunirse nos outeiros de Göbekli Tepe.
Hai máis de 11.000 anos, os cazadores recolectores, até agora considerados incapaces de construír estruturas permanentes, “comezaron a alzar estruturas monumentais nese lugar cunha intención que, pola ausencia dunha linguaxe escrita, só podemos intuír”.
Isabel Muñoz asegura que foi un gran privilexio poder fotografalo, “eu non son unha fotógrafa de arqueoloxía nin unha arqueóloga, pero quería contalo dunha forma moi especial, achegarme a eles, amalos e transmitir ese amor e o que nos querían contar”.
Na exposición pódense ver pezas nas que “está presente a terra turca, o ADN desas persoas”, e onde a fotógrafa puido investigar sobre unha nova forma de contar. Todas as fotografías están realizadas de noite, “coa mesma iluminación que usaban eles, con eses fachos que desvelan moitas das cousas e moitos dos enigmas que nos quixeron deixar”.
Isabel Muñoz traslada en grandes caixas de luz, fotografía de gran formato, impresións con metais preciosos ou terra dos xacementos turcos o espírito desta civilización, que é practicamente descoñecida para o resto do mundo.
A artista radiografía, a través do seu obxectivo, o máis básico do ser humano, os seus movementos, os ritos que facían, o sentido dos símbolos, a importancia da lúa e a auga en Karahan. Algunhas das obras están emulsionadas en prata e ouro.
Isabel Muñoz gañou dous premios World Press Photo, o Premio Nacional de Fotografía de España 2016, a medalla ao Mérito das Belas Artes e é membro da Academia de Belas Artes de San Fernando.
A exposición estará aberta ata o vindeiro 6 de marzo.
