Bisbarra, 18 de setembro do 2023 – Unha andaina reivindicativa serviu para lembrar o proxecto de construción dunha central de bombeo no Tambre, en Cornanda, á que se opón a veciñanza.
O proxecto de construción dunha central de bombeo en Cornanda data de principios de ano. Na reunión na que se creo unha comisión co fin de alegar contra a infraestrutura o alcalde, Pablo Lago, dicía que “nesta reunión quedou claro que ninguén na parroquia quere que se instale esta central hidráulica reversible no río Tambre, polo que o Concello fará fronte común cos seus veciños e traballaremos conxuntamente para presentar as mellores alegacións posibles”.
Esta fin de semana organizábase unha andaina reivindicativa que discorreu polos puntos clave onde se pretende asentar a balsa, nas proximidades das aldeas de A Graña, Vilariño, Busto de Frades e Cornanda.
A pesares das previsións climatolóxicas, a choiva deu tregua e conseguiuse reunir un gran número de persoas no entorno do encoro “Barrié de la Maza”. O percorrido comezou arredor das 11 horas e rematou 2 horas máis tarde nas proximidades da “Pedra do Santo”, en Busto de Frades.
Ao chegar á meta, a Plataforma mostrou o seu agradecemento pola asistencia cun pequeno almorzo. Alí tamén se lle explicou a todos aqueles que descoñecían a existencia deste problema, os prexuízos futuros que pode ocasionar no benestar da veciñanza e á contorna en xeral.
Na ruta participaron máis de cen persoas o que demostra segundo a Plataforma que “a comarca está totalmente en contra da execución do proxecto, querendo preservar o entorno natural tal e como está na actualidade, cunha riqueza extraordinaria que é o sustento de moitas familias dedicadas á gandaría e á agricultura”.
A ruta serviu ademais para convocar aos participantes a unha concentración para o próximo 30 de setembro, dende o Paseo da Alameda ata a Praza de Praterías en Santiago de Compostela, co obxectivo de esixir información sobre o estado da tramitación do expediente e tamén para solicitar unha reunión para explicar o seu posicionamento.
