Conversas, 14 de marzo do 2024 – Con esta conversa con Borja Verea completamos a serie de entrevistas aos líderes dos partidos con representación no concello de Santiago.
A vindeira semana engadiremos tamén unha conversa con Aitor Bouza do Partido Socialista que, sen ser concelleiro, foi elixido tras as eleccións municipais secretario da agrupación socialista de Compostela.
O Partido Popular recuperou terreo nas últimas eleccións municipais cuns resultados que o colocaron como a forza máis votada pero sen maioría absoluta. Borja Verea conseguiu once concelleiros e considera que é un punto de partida, unha opción real de gobernar, para dentro de catro anos.
Os populares comezaron a facer oposición o mesmo día da toma de posesión, convocando aos medios nun salón anexo a aquel no que se celebraba o acto. Borja Verea non cuestiona a lexitimidade do goberno municipal pero lembra, sempre que pode, que o sentido común era que foran eles os que formaran goberno.
Non ter a maioría nun goberno pode complicar moito o traballo xa que nada garante que as propostas que leves a pleno saían adiante. Preguntamos se, no caso de gobernar, sería capaces de chegar a acordos.
Esta entrevista realizouse tras a reunión da Xunta de Galicia co concello na que se tratou o aparcamento do clínico. Borja Verea asegura que si el fose alcalde o aparcamento estaría xa en marcha.
Sorprende que Borja Verea non considera a proposta do goberno municipal como de mobilidade. Pese as melloras no transporte urbano, a ampliación de prazas de aparcamento ou a remodelación da rotonda de acceso o voceiro popular considera que a única proposta é a da parcela do CIMUS, ao mesmo tempo recoñece de forma implícita que a proposta que eles fan é tan só para a parcela do clínico e non para a contorna.
En calquera caso as propostas son sempre a medio ou longo prazo e tampouco atopamos en Borja verea solucións para arranxar o problema actual. Recoñece de todos xeitos que unha vez tomada a decisión sobre o aparcamento a parcela do CIMUS podería ser un arranxo provisional.
A conversa sobre o clínico consumiu moito tempo pero non queríamos rematar sen falar dunha situación que todos parecen obviar, a da Casa da Xuventude. Partido Popular e BNG querían derrubala polo que os votos serían suficientes pero Borja Verea deixa claro que o apoio ten que ser de todo o goberno municipal.
Quedan cousas por falar e catro anos por diante para facelo. Si hai algo que se pode recoñecer a Bora Verea é que non escapa ás preguntas directas e responde a todo, algo de agradecer. O equilibrio entre Xunta e concello sempre foi complicado e a medida que o mandato avance veremos como se resolven moitos dos temas da cidade o como quedan apartados nunha beira do camiño. Os Populares polo de agora miran xa ás seguintes municipais.
