Compostela, 13 de abril do 2023 – Conversamos co autor de “Mamá”, Edmundo Díaz; un ourensán de nacemento, compostelá de adopción e na actualidade andaluz por empadroamento.
“Mamá” é unha novela que camiña entre o romanticismo e o drama, que provoca unha bágoa que nunca acaba de caer e que mantén a tensión no punto xusto de interese; sen o, as veces, aburrimento costumista nin os excesos dos guións.
Edmundo Díaz é, pola súa banda, un personaxe dentro e fora da novela. Sempre atento ao que escoita e sempre cunha resposta preparada que, en moitas ocasións e como bo galego, concrétase en forma de pregunta.
“Mamá” é a súa propia historia, a do autor; a da rotura coa súa nai; a dunhas cartas que demostran o que as aparencias poden enganar; a da súa vida en Compostela. Citámonos nunha das rúas polas que tanto paseou nos convulsos anos oitenta. “Mamá” é un libro de momentos, avanza a base de escenas que sitúan ao lector en decorados que van cambiando; Edmundo Díaz cóntanos que quixo facer unha obra emotiva e emocionante.
Nas súas anteriores obras Díaz pasou por xéneros como a novela negra ou a histórica. Esta parécenos unha peza melancólica o que nos confirma argumentando que é galega polos catro costados, que nunca escribiu unha novela tan galega.
En certo modo este é un libro de auto axuda pero para o autor, unha forma de reparar vellas feridas da alma e coser algunhas lembranzas rotas
“Mamá” descóbrenos ademais a un Edmundo Díaz cunha obsesión por escribir, por contar historias que acabou por concretarse co conseguinte enfado da súa nai
Para o autor este libro era unha conta pendente. Recoñece que non podía saldala mentres a súa nai vivira pero consciente de que en algún momento tería que sentarse a escribir. Con todo, Díaz destaca que se trata dunha obra con drama, inevitable, pero que tamén ten humor.
Non podemos rematar sen preguntar por aqueles anos en Compostela. O libro pivota entre Ourense e Santiago e, si un viviu aquí por aquel entón, non pode evitar pensar a dobre cara que tiña a cidade do Apóstolo. Para Edmundo Díaz, pese a esa cruel realidade, era un lugar cheo de luz.
Poderíamos falar con el todo un día, o autor sabe escoitar e gústalle saber. Ao mesmo tempo conta o que sinte e pensa con honestidade. Edmundo Díaz é un conversador nato e “Mamá” é de algún xeito unha conversa entre o lector e o escritor. Unha historia que recomendamos pola súa beleza e sinceridade.