Conversas, 21 de novembro do 2023 – Antón Antelo é o xerente de Xestión de Actividades Deportivas e Espectáculos S.L., o que todo o mundo coñece como o Multiúsos ou Multisan na campaña actual.
Pero tras o Multiúsos hai un equipo de persoas que dirixe Antón e que ademais do Fontes do Sar xestiona o complexo de Santa Isabel e as piscinas do Sar. A xestora é unha empresa mixta na que Consorcio, Concello, Xunta e iniciativa privada acordan que facer cada tempada.
Antón Antelo está, como xerente, no medio de ese tornado. Falando con el transmite a serenidade, que se supón que hai no ollo do furacán, froito da experiencia de máis de 20 anos de traballo.
Son equipamentos que se usan para a practica do deporte afeccionado, pero tamén para as competicións federadas e para eventos culturais. Antón Antelo destaca a labor de servizo a cidade que foi fundamental cando o accidente do Alvia.
A xestión dos equipamentos públicos está sempre no debate entre o público e o privado. O modelo mixto, usado no Multiúsos desde o 2001, revélase nos últimos tempos como unha das mellores opcións e grazas a cal a veciñanza pode usar instalacións de primeiro nivel a prezos axustados.
É moi posible que a cidadanía non lle de o valor patrimonial que corresponde ao Multiúsos. Antón Antelo explica que en toda España non hai máis de media ducia de espazos coas características do Multiúsos. Ao mesmo tempo o seu nivel de actividade e case único, desde as 1.500 persoas que cada día fan deporte ata os eventos que se organizan, en moitas ocasións ao mesmo tempo.
No mes de xaneiro chegará o Cirque du Soleil a estas instalacións. No Multiúsos hai concertos, banquetes, mitins, mesmo misas ou campionatos de fútbol praia. Preguntámoslle a Antón polas súas lembranzas; ten moitas pero unha en especial relacionada cun concerto de JOaquín Sabina.
Pero si hai un momento no que a instalación prestou un servizo especial á cidade foi co accidente do Alvia. Todos os cadáveres foron traslados alí e alí traballaron durante días os forenses. Antón pon en valor o traballo dos voluntarios e de todo o persoal que se volcou en eses días. Tamén en ese caso as anécdotas persoais de Antón impactan.
Os veciños acudimos ás instalacións, facemos deporte, vemos os concertos ou os espectáculos; marchamos e falamos de todo iso sen decatarnos do persoal que hai detrás. Xunto a Antón traballan 115 persoas que ao longo dos anos tiveron que facer de todo. O xerente danos un pequeno dato que sorprende: o Circo do Sol trae 25 lavadoras industriais que hai que conectar.
O equipo que xestiona o Multiúsos, o Complexo de Santa Isabel e as piscinas, fai un traballo enorme que pasa desapercibido na maioría dos casos. As instalacións, en especial o Fontes do Sar, están á altura dunha gran urbe e ningunha desas está nunha cidade de menos de 100.000 habitantes.
O traballo de Antón Antelo e o seu equipo é un exemplo de eficiencia. A complexidade da xestión na que se integran organismos públicos e privados é resolta con voa vontade e moita paciencia.
Vótase de menos unha aposta máis decidida polo aproveitamento de estas instalacións. Exemplo é que o único espazo en toda Galicia ao que pode vir o Circo do Sol é precisamente o Multiúsos Fontes do Sar. Dada a boa acollida de case todo o que pasa por aquí o lóxico sería ampliar esa programación e mesmo mellorar na medida do posible as instalacións.
En calquera caso querido lector cando pases de novo polo Multiúsos pensa en todo o traballo que hai detrás e a exclusividade das instalacións que visitas.
