Lindeiros, 11/03/2026 . A Deputación da Coruña acaba de asinar un convenio coa Asociación Culturgal para colaborar no financiamento económico da última edición do evento.
A deputada de Cultura, Natividade González, salienta que, con este acto, a institución ratifica o seu “compromiso” coa maior feira cultural do país. Mediante este convenio, a Deputación achegará 48.000 para contribuír a sufragar os gastos do Culturgal 2025. Pola institución provincial puxo a súa sinatura Natividade González, mentres que a Asociación Culturgal estivo representada por Víctor López.
Para Natividade González, Culturgal é un “espazo fundamental de encontro entre creadoras, profesionais da cultura e público”. Cómpre lembrar que nesta última edición visitaron a feira máis de 16.000 persoas.
A Deputada remarcou que para a Deputación “é prioritario apoiar iniciativas que fomenten a creación, a difusión cultural e o acceso da cidadanía á cultura. Culturgal é un exemplo de cooperación entre institucións e sector cultural que contribúe a dinamizar a nosa cultura e a proxectala cara ao futuro”.
